کانگریس کے سابق صدر راہل گاندھی نے جنوبی کشمیر کے اننت ناگ ضلع میں لکہ بھون لارکی پورہ کے مقام پر ایک مقامی سرپنچ کی ہلاکت پر افسوس ظاہر کرتے ہوئے ان کے اہل و عیال اور احباب سے ہمدردی کا اظہار کیا ہے۔
راہل گاندھی نے اس سلسلہ میں ایک ٹویٹ کیا جس میں انہوں نے لکھا: ' اجے پنڈتا (سرپنچ) کے گھرکے خاندان و ان کے احباب کو میری طرف سے تعزیت۔ اجے پنڈتا نے کشمیر میں جمہوری نظام کو مستحکم بنانے کے لیے قربانی دی۔ ہم ان کے گھر والوں کے ساتھ اظہار یکجہتی کرتے ہیں۔ تشدد کی کبھی جیت نہیں ہوگی۔'
قابل ذکر ہےکہ اننت ناگ ضلع میں لکہ بھون لارکی پورہ کے مقام پر ایک مقامی سرپنچ پر نامعلوم مسلح افراد نے گولیاں چلائیں، جس کے نتیجے میں وہ شدید طور پر زخمی ہو گیا۔ انہیں فوری طور پر ہسپتال منتقل کیا گیا جہاں انہیں ڈاکٹرز نے مردہ قرار دے دیا۔
پولیس نے ایک بیان میں کہا کہ کانگریس سے وابستہ سرپنچ اجے پنڈتا ولد اومکار ناتھ پنڈتا کو مسلح افراد نے لکہ بھون گاؤں میں واقع ان کی رہائش گاہ کے نزدیک ہلاک کردیا۔ پولیس کے مطابق اننت ناگ پولیس نے اس واقعہ کے بارے میں متعلقہ دفعات کے تحت کیس درج کیا ہے۔
