PDP Foundation Day: اننت ناگ میں پی ڈی پی کا 23واں یوم تاسیس منایا گیا

پیپلز ڈیموکریٹک پارٹی کی جانب سے وادی کے مختلف علاقوں سمیت اننت ناگ میں بھی 23واں یوم تاسیس بڑے جوش و خروش کے ساتھ منایا گیا۔ PDP Foundation Day Celebrated In Anantnag

اننت ناگ:پی ڈی پی کے 23 ویں یوم تاسیس کے موقع پر اننت ناگ میں ایک تقریب کا انعقاد کیا گیا جس میں پی ڈی پی کے سرکردہ رہنما سرتاج مدنی، فاروق احمد اندرابی، محبوب بیگ سمیت جنوبی کشمیر کے مختلف علاقوں سے پارٹی کارکنان نے بڑی تعداد میں شرکت کی ۔

اس تقریب میں پارٹی کارکنان سے خطاب کرتے ہوئے پی ڈی پی کے سینئر رہنماؤں نے کہا کہ مرحوم مفتی محمد سعید نے سیاسی مقاصد حاصل کرنے کے لیے پارٹی کی داغ بیل نہیں ڈالی، بلکہ انہوں نے جموں و کشمیر کے لوگوں کی بقا، ان کے وقار کو بلند کرنے، امن و امان قائم کرنے اور ریاست کو ترقی کی راہ پر گامزن کرنے کے لیے پی ڈی پی کا وجود عمل میں لایا۔ یہاں کے لوگ بخوبی واقف ہیں کہ مرحوم کے دور اقتدار میں جموں و کشمیر میں سبھی کے لیے کس طرح سے کام کیا گیا۔ وہ ایسی سیاسی شخصیت تھے جو اقتدار کے پیچھے نہیں دوڑتے تھے بلکہ اقتدار ان کے پیچھے دوڑتا تھا۔

صحافیوں سے بات کرتے ہوئے پی ڈی پی کے ضلع ترجمان نجم الثاقب نے کہا کہ پی ڈی پی کی ساخت کمزور ہونے کے بارے میں بات کرنے والے افراد کو آج یوم تاسیس کی تقریب میں شامل لوگوں کے ہجوم کو دیکھ کر جواب مل گیا ہوگا۔ انہوں نے کہا کہ پی ڈی پی ہر محاذ پر لڑنے کی بھرپور صلاحیت رکھتی ہے۔ انہوں نے کہا کہ پارٹی چھوڑ کر چلے جانے والے افراد سے انہیں کوئی فرق نہیں پڑتا، پی ڈی پی ایک عوامی پارٹی ہے اور پارٹی کو عوام کا بھرپور تعاؤن حاصل ہے۔ اس تقریب کو پر امن طریقے سے انجام دینے کے لیے انتظامیہ نے سخت سیکورٹی کے انتظامات کیے تھے۔