ضلع ترقیاتی کمشنر اننت ناگ ڈاکٹر پیوش سنگلا نے ضلع میں جاری مختلف علاقوں میں پی ایم جی ایس وائی کے تحت سڑکوں کی تجدید مرمت کام کا جائزہ لیا انہوں نے کہا کہ رابطہ سڑکوں کا بنیادی ڈھانچہ مضبوط ہونے سے نہ صرف عوام کو سہولت ملے گی بلکہ اس سے پورے ضلع میں روزگار اور ترقی کے راستے کھل جائیں گے۔
ڈی سی نے کہا کہ ہر علاقہ میں پختہ رابطہ سڑکوں اور زیر التواء تمام منصوبوں کو محدود مدت کے اندر مکمل کرنے کے اقدامات اٹھائے گئے ہیں۔
ضلع کمشنر نے ضلع کے نوشہرہ، سرہامہ، ہٹی گام، دری گنڈ، ودائی و دیگر کئی مختلف علاقوں میں جاری کام کا جائزہ لیا۔ ڈی سی نے مال، جل شکتی، جنگلات اور بجلی محکموں کو ہدایت دی کہ وہ باہمی تال میل کے ساتھ کام کریں تاکہ ترقیاتی منصوبوں میں حائل تمام رکاوٹوں و معاملات کو حل کریں۔
انہوں نے متعلقہ محکموں کے کام کاج پر اطمینان کا اظہار کرتے ہوئے کہا کہ حالیہ دنوں میں خاطر خواہ پیشرفت ہوئی ہے۔لوگوں نے رابطہ سڑکوں کے تعمیراتی کام میں سرعت لانے پر انتظامیہ کے قدم کی سراہنا کی۔
انہوں نے کہا کہ سڑکوں کا بنیادی ڈھانچہ مستحکم ہونا ہر علاقہ کی ترقی کا ضامن ہے۔