اننت ناگ: فارسٹ رائٹس ایکٹ کے بارے میں ورکشاپ منعقد

اننت ناگ کے ڈاک بنگلو میں ضلع ترقیاتی کمشنر ڈاکٹر پیوش سنگلا نے مختلف محکموں کے افسران کے ساتھ ایک میٹنگ منعقد کی۔جہاں انہوں نے فاریسٹ رائٹس ایکٹ 2006 کو زمینی سطح پر نافذ کرنے کی بات کہی۔

جموں و کشمیر کے ضلع اننت ناگ کے ضلع ترقیاتی کمشنر ڈاکٹر پیوش سنگلا نے تمام متعلقہ محکموں پر زور دیا کہ وہ فارسٹ رائٹس ایکٹ 2006 کو زمینی سطح پر نافذ کرنے میں اپنا کلیدی کردار ادا کریں۔

انہوں نے جنگلات، دیہی ترقی، مال، اینمل اینڈ شیپ ہسبنڈری و دیگر متعلقہ محکموں کے افسران کو ہدایت دی کہ وہ باہمی تال میل سے کام کریں اور مستحق افراد کی نشاندہی کرکے متعلقہ ایکٹ کے تحت ان کے حقوق کی بازیابی کو یقینی بنائیں۔ ڈی سی نے ان باتوں کا اظہار ضلع اننت ناگ کے ڈاک بنگلو میں متعلقہ محکموں کے افسران کے ساتھ منعقدہ ایک تربیتی ورکشاپ و میٹنگ کے دوران کیا۔

ڈی سی نے سب ڈسٹرکٹ مجسٹریٹس کو ہدایت دی کہ وہ اس سلسلہ میں روزانہ کی بنیاد پر بیداری پروگرامز اور ورکشاپ کا انعقاد کریں اور اپنے علاقوں سے متعلق پیش رفت کا جائزہ لیں۔

ماسٹر ٹینر ڈویژنل فارسٹ افسر لدر ڈویژن بجبہاڑہ نے فارسٹ رائٹس ایکٹ سے متعلق مختلف دفعات سے حاضرین کو آگاہ کیا اور متعلقہ ایکٹ کی پیش رفت کے بارے میں تفصیلی جانکاری دی۔