اننت ناگ: فارسٹ رائٹس ایکٹ کے تعلق سے جائزہ میٹنگ کا انعقاد

جنگلات کے تحفظ کو یقینی بنانے کے ساتھ ساتھ فارسٹ رائٹس ایکٹ کے تحت پہاڑی طبقہ سے وابستہ افراد کے حقوق کی بازیابی کو یقینی بنانے پر زور دیا گیا۔

ضلع اننت ناگ کے ڈاک بنگلو، کھنہ بل میں جنگلات حقوق ایکٹ 2006 (فارسٹ رائٹس ایکٹ) کی پیش رفت کے حوالے سے ایک پروگرام کا انعقاد کیا گیا۔ پروگرام کی صدارت ٹرائبل ریسرچ ٹریننگ انسٹی ٹیوٹ پونے، مہاراشٹر کے سابق کمشنر اروند کمار جھا نے کی۔

اس موقع پر فارسٹ رائٹس ایکٹ کی اہم دفعات جیسے اہلیت، حقوق، ذمہ داری، پائیداری و دیگر موضوعات پر تفصیلی تبادلہ خیال کیا گیا۔

فارسٹ رائٹس کمیٹیوں کی تشکیل اور فارسٹ رائٹس ایکٹ کی عمل آوری کے بارے میں محکمہ مال، دیہی ترقی اور جنگلات کے افسران کے ساتھ گفتگو کی گئی۔

جھا نے اس بات پر زور دیا کہ جنگلات کے تحفظ کو یقینی بنانے کے ساتھ ساتھ متعلقہ ایکٹ کے تحت پہاڑی طبقہ سے وابستہ افراد کے حقوق کی بازیابی کو یقینی بنایا جائے۔

انہوں نے پائیدار ترقی اور ایکٹ میں موجود دفعات کے غلط استعمال کو روکنے کی ضرورت پر زور دیا۔

سابق کمشنر نے ملک کے دیگر مقامات کے کیس اسٹڈیز پر تبادلہ خیال کیا اور شرکاء کو ان کے بروقت اور مناسب حل کے علاوہ ایکٹ کے نفاذ کے دوران درپیش معمول کی رکاوٹوں کے بارے میں روشنی ڈالی۔

اس موقع پر کمشنر نے پی آر آئی ممبران کے علاوہ مختلف محکموں کے فیلڈ افسران سے بات چیت کی۔ جھا نے ان کے مسائل سنے اور ایکٹ کے نفاذ اور درپیش مسائل و مطالبات کو حل کرنے کی یقین دہانی کی۔