الطاف کی موت کی جوڈیشل انکوائری کا مطالبہ

راشٹیہ لوک دل اور پرچم پارٹی آف انڈیا کے رہنماؤں نے کاس گنج کے رہائشی الطاف ولد چاند میاں کی موت کو قتل قرار دیتے ہوئے اس واقعہ کی مذمت کی اور جوڈیشل انکوائری کا مطالبہ کیا۔

ریاست اترپردیش کے کاسگنج کے رہائشی 22 سالہ الطاف کی پولیس حراست میں موت پر سول سوسائٹی میں ناراضگی پائی جارہی ہے اور پولیس کو شک کی نگاہ سے دیکھا جارہا ہے۔

وہیں الطاف کی موت پر پولیس کی جانب سے جاری بیان پر بھی خوب تنقید ہورہی ہے۔ پولیس کا کہنا ہے کہ الطاف حسین نے بیت الخلا جانے کی ضد کی تھی جس کے بعد اس نے بیت الخلاء میں موجود پانی کی ٹوٹی پر لٹک کر خودکشی کرلی۔ پولیس کے اس بیان پر سوال پیدا ہوتا ہے کہ کیا بیت الخلاء میں موجود ٹوٹی اتنی اونچائی پر تھی جس پر 5 فٹ سے زیادہ لمبا آدمی لٹک کر خودکشی کر سکتا ہے۔'

پرچم پارٹی آف انڈیا کے ریاستی صدر سید ناظم علی نے کہاکہ' جس طرح ضلع کاس گنج کے الطاف کو پولیس نے حراست میں مارا ہے یہ انتہائی تشویش ناک ہے۔

ریاست اتر پردیش کی حکومت میں مسلسل مسلمانوں کو نشانہ بنایا جارہا ہے اور بعد میں دباؤ سے سمجھوتا کرا کے معاوضہ کا اعلان کردیا جاتا ہے۔

ریاست کی یوگی حکومت نے کہا تھا کہ ہم ریاست کو جرائم سے پاک کریں گے، جبکہ اس کے برعکس لوگوں کو حراست قتل کیا جارہا ہے، جب مجرم وردی والے ہیں تو حکومت ان پر کارروائی کیوں نہیں کرتی۔'

ہمارا مطالبہ ہے کہ الطاف کے اہل خانہ کو ایک کروڑ کا معاوضہ دیا جائے۔ اس میں کسی بھی طرح کا امتیازی سلوک نہ برتا جائے۔

مزید پڑھیں:

راشٹیہ لوک دل کے جنرل سیکریٹری راجہ بھیا نےکہا ہمارے اور عوام کی ذہن میں جو سوال اٹھ رہا ہے وہ یہی ہے کہ کاس گنج پولیس ہی الطاف حسین کی قاتل ہے۔ انہوں نے ہی اس کا قتل کیا ہے۔ اسی لئے راشٹیہ لوک دل کا مطالبہ ہے کہ وہاں کے ایس پی اور تمام پولیس اہلکاروں کے خلاف قتل کا مقدمہ درج ہو اور اس پورے معاملے کی جوڈیشل انکوائری ہو۔'