شعبہ ریاضی علی گڑھ مسلم یونیورسٹی کے تاریخی شعبوں میں سے ایک ہے، جس میں موجودہ وقت میں 100 سے زیادہ طلبہ ریسرچ کر رہے ہیں۔ شعبہ ریاصی کی موجودہ لائبریری کافی اہم اور بڑی لائبریری بتائی جاتی ہے جس کا شمار ایشیا کی اہم ریاضی لائبریریوں میں ہوتا ہے۔
اے ایم یو کے شعبہ ریاضی کے لیے نیا سال ایک نئی امید یو ایس نیوز اینڈ ورلڈ رینکنگ کے مطابق اے ایم یو کے شعبہ ریاضی کو بھارت کی تمام بڑی یونیورسٹیوں میں اول اور دنیا میں 175وا مقام حاصل ہوا۔واضح رہے کہ کچھ روز قبل یو ایس نیوز اینڈ ورلڈ رینکنگ نے علی گڑھ مسلم یونیورسٹی کو بھارت کی چوتھی بہترین یونیورسٹی قرار دیا تھا۔
اے ایم یو شعبہ ریاضی کے ایسوسی ایٹ پروفیسر ڈاکٹر شاکر علی نے خصوصی گفتگو میں بتایا کہ' گذشتہ پانچ برسوں سے ہمارا شعبہ بھارت میں اول مقام حاصل کرتا آرہا ہے، اس بار بھی بھارت میں اول اور دنیا میں 175ویں رینکنگ حاصل کیا ہے۔
انہوں نے کہاکہ' شعبہ ریاضی کے تمام اساتذہ اور طلبہ کی محنت سے ہی ممکن ہو پایا ہے۔ڈاکٹر شاکر علی نے مزید بتایا کہ' ہمارے شعبہ میں بی ایس سی، ایم ایس سی کے ساتھ ریسرچ بھی کرائی جاتی ہے۔ موجودہ وقت میں تقریبا 100 سے زائد طلبہ ریسرچ کر رہے ہیں۔ یہاں کے فارغین نہ صرف بھارت میں بلکہ دنیا کے مختلف ممالک میں اعلی عہدوں پر فائز ہیں۔
ڈاکٹر شاکر نے خوشی کا اظہار کرتے ہوئے امید ظاہر کی کے آنے والے وقت میں دنیا کی رینکنگ میں ہمارا شعبہ اور اچھا مقام حاصل کرے گا۔
