گجرات کے احمدآباد میں واقع شاہی جامع مسجد میں علمائے کرام نے پریس کانفرنس کو خطاب کیا۔ اس موقع پر شاہی امام اور گجرات چاند کمیٹی کے صدر مفتی شبیر احمد صدیقی نے کہا کہ اترپردیش شیعہ وقف بورڈ کے سابق چیئرمین وسیم رضوی نے حضرت محمد صلی اللہ علیہ وسلم کے نام پر ایک کتاب تحریر کی ہے جس میں انہوں نے پیغمبر اسلامﷺ کی شان میں گستاخی کی ہے۔
گستاخ رسول وسیم رضوی کے خلاف سخت قانون کاروائی کا مطالبہ
انہوں نے کہا کہ متنازعہ کتاب میں پیغمبر اسلامﷺ کی شان میں نازیبا جملے تحریر کئے گئے جس سے مسلمانوں کے جذبات مجروح ہوئے ہیں۔ انہوں نے گستاخی کی پرزور مذمت کرتے ہوئے وسیم رضوی کے خلاف سخت کاروائی کرنے کا مطالبہ کیا۔ مفتی شبیر احمد صدیقی نے صدر جمہوریہ رام ناتھ کووند اور وزیراعظم نریندر مودی سے فوری طور پر پیغمبر اسلامﷺ کی شان میں گستاخی کرنے والوں کے خلاف قانون بنانے کا مطالبہ کیا۔