احمدآباد: یومِ آزادی کے موقع پر نئی نسل کے لئے ’’سفرِ وراثت‘‘ کا اہتمام

یومِ آزادی کے موقع پر احمدآباد میں ’’سفرِ وراثت‘‘ کا اہتمام کیا گیا، جس میں نئی نسل کو مسلمانوں کے تاریخی کاموں کے بارے میں بتایا گیا اور شہر کی مختلف مساجد کا دورہ کرکے جانکاری دی گئی۔

احمدآباد میں ایسوسی ایشن آف مسلم انٹلیکچول اور احمد شاہ آرمی کی جانب سے یومِ آزادی کے موقع پر احمدآباد ہیریٹیج والک سفر وراثت پروگرام کا اہتمام کیا گیا، جس میں لوگوں نے احمدآباد کی تاریخی وراثت کے سلسلہ میں معلومات حاصل کی۔

اس تعلق سے پروگرام کے آرگنائزر معین کھوکھر نے کہا کہ یوم آزادی کے موقع پر لوگ کئی طرح کے پروگرام کرتے ہیں لیکن ہم نے ان سب سے الگ جاکر احمدآباد کی تاریخی وراثت لوگ جان سکیں اور اس کی حفاظت کرسکیں اس مقصد کے تحت ’’سفر وراثت‘‘ پروگرام کا اہتمام کیا اور ورلڈ ہیریٹیج سٹی کا لقب حاصل کرنے والے احمدآباد شہر کی تاریخی وراثت کے بارے میں عوام کو معلومات پہنچائی۔

سفر وراثت

وہیں احمدآباد سنی مسلم وقف کمیٹی کے کوآرڈینیٹر رئیس منشی نے کہا کہ احمدآباد کی تاریخی وراثت اور ہندو مسلم تہذیب و تمدن سے واقف کرانے کے لئے آج سفر وراثت کا اہتمام کیا گیا۔ اس میں کووڈ کی گائڈ لائنز پر عمل کرتے ہوئے کم تعداد میں لوگوں کو شامل کیا گیا۔

سفر وراثت

اس موقع پر خاص طور سے سیدی سید کی جالی والی مسجد، قدیم جامع مسجد، بھدر قلعہ، تین دروازہ، رانی روپ متی کی مسجد، محافظ خان کی مسجد، بڑی جامع مسجد اور بادشاہ کا حجرہ جیسی تاریخی مساجد و وارثت کا سفر کیا گیا۔

اس سفر وراثت میں شامل ہونے والے بی جے پی اقلیتی سیل گجرات کے جنرل سیکرٹری زین العابدین انصاری نے کہا کہ یہ بڑی مسرت کی بات ہے کہ اے ایم آئی کی جانب سے سفر وراثت پروگرام کا اہتمام کیا گیا۔ جس میں لوگوں کو اور خاص طور پر آنے والی نسلوں تک وراثت کی معلومات پہنچانے کا جو قدم اٹھایا گیا ہے وہ قابل تعریف ہے۔ سفر وراثت کے ذریعے آج لوگوں نے اپنی بیش قیمتی وراثت کو جانا سمجھا اور اس کی حفاظت کرنے کا عہد کہا ہے۔