گجرات: 'راجیہ سبھا انتخاب میں کانگریس کے لیے کافی مشکل وقت'

جیسے جیسے گجرات میں راجیہ سبھا انتخابات قریب آرہے ہیں ویسے ویسے کانگریس کی مشکلات بڑھتی جا رہی ہے کیونکہ ایک ایک کرکے کانگریس کے رکن اسمبلی کانگریس پارٹی سے الگ ہو رہے ہیں۔

گزشتہ چوبیس گھنٹوں کے دوران گجرات کے 3 ارکان اسمبلی نے کانگریس پارٹی کو الوداع کہہ دیا ہے۔ راجیہ سبھا انتخابات کے اعلان کے بعد سے کانگریس کے 8 ارکان اسمبلی پارٹی چھوڑ چکے ہیں، ایسے میں آج موربی نشست کے کانگریس کے رکن اسمبلی برجیش میرزا کا ایک نیا نام سامنے آیا ہے اور انہوں نے اسپیکر کو اپنا استعفی دے دیا ہے۔

اس سے قبل، احمد پٹیل کے راجیہ سبھا کے انتخاب کے دوران بھی اسی طرح کانگریس کے ارکان اسمبلی نے استعفیٰ دیا تھا اور بی جے پی نے ارکان اسمبلی کی خرید و فروخت کا کام کیا تھا۔

انہوں نے مزید کہا کہ گجرات تو بی جے پی کا گڑھ ہے یہاں ان کی حکومت ہے، کانگریس کے جتنے بھی زیادہ ارکان اسمبلی استعفی دیں گے اتنا ہی زیادہ بی جے پی کو فائدہ پہنچے گا اور ان کے تمام امیدواروں کو جیت حاصل ہوگی۔ اس لیے بی جے پی راجیہ سبھا الیکشن میں کسی بھی طرح جوڑ توڑ کی سازش کر رہی ہے۔

ذرائع کے مطابق کانگریس کے امیدوار شکتی سنگھ گوہل کی راجیہ سبھا میں جیت طے مانی جا رہی ہے لیکن دوسرے امیدوار بھرت سنگھ سولنکی کی جیت بہت مشکل ہے۔ واضح رہے کہ الیکشن کمیشن کے اعلان کے مطابق راجیہ سبھا کی 18 نشستوں کے لیے انتخابات 19 جون کو ہوں گے، جس میں سے گجرات میں راجیہ سبھا کی چار نشستوں کے لیے انتخابات ہونگے۔

اس موقع پر صبح 9 بجے سے چار بجے تک ووٹنگ کی جائے گی۔ ووٹوں کی گنتی شام پانچ بجے کے بعد ہوگی۔