پیٹرول اور ڈیزل کی قیمتوں میں مسلسل دوسرے دن بھی کمی

بین الاقوامی مارکٹ میں خام تیل کی قیمتوں میں زبردست کمی کے باعث آج گھریلو سطح پر پیٹرول اور ڈیزل کی قیمتوں میں مسلسل دوسرے دن کمی آئی ہے۔

دہلی میں پیٹرول 21 پیسے فی لیٹر اور ڈیزل 20 پیسے فی لیٹر سستا ہوگیا۔ آئل مارکیٹنگ کرنے والی کمپنی انڈین آئل کارپوریشن کے مطابق جمعرات کو دہلی میں پیٹرول 90.78 روپے فی لیٹر اور ڈیزل 81.10 روپے فی لیٹر پر آگیا۔

اس سے قبل ان ایندھنوں کی قیمتوں میں مسلسل 24 دنوں تک کوئی تبدیلی نہیں ہوئی تھی۔ گزشتہ ماہ پیٹرول اور ڈیزل کی قیمتوں میں لگاتار 16 دنوں تک اضافہ ہوا تھا جس کی وجہ سے تقریباً ہر شہر میں دونوں ایندھنوں کی قیمتیں ریکارڈ وقت کی سطح پر پہنچ گئی تھیں۔

بین الاقوامی مارکٹ میں 16 دنوں میں خام تیل کی قیمت میں تقریبًا 15 فیصد کمی واقع ہوچکی ہے۔ یورپ میں کورونا کی تیسری لہر کی وجہ سے وہاں ایندھن کے مطالبہ میں کمی کا خدشہ ظاہر کیا جارہا ہے ۔ اس کی وجہ سے خام تیل کی قیمت گھٹ کر 60 ڈالر فی بیرل پر آچکی ہے۔

عام طور پر کچھ ریاستوں میں اسمبلی انتخابات ہونے کی وجہ سے تیل کی قیمتوں میں کوئی تبدیلی نہیں کی جاتی تھی لیکن اس بار ایسا نہیں ہوا ہے۔ بہار اسمبلی انتخابات کے وقت تیل کی قیمتوں میں کوئی تبدیلی نہیں کی گئی تھی لیکن ابھی مغربی بنگال، کیرالا، تمل ناڈو، آسام اور مرکز کے زیر انتظام علاقہ پڈوچیری میں ہونے والے اسمبلی انتخابات کے درمیان تیل کی قیمتوں میں کمی کی گئی ہے۔

ملک کے چار بڑے شہروں میں پیٹرول اور ڈیزل کی قیمت مندرجہ ذیل ہیں۔:

شہر ۔۔۔۔۔پیٹرول فی لیٹر۔۔۔۔ڈیزل فی لیٹر

دہلی ۔۔۔۔۔90.78 ۔۔۔۔۔۔81.10

ممبئی۔۔۔۔۔ 97.19 ۔۔۔۔۔۔88.20

چنئی۔۔۔۔۔ 92.77 ۔۔۔۔۔۔86.10

کولکاتا۔۔۔۔۔ 90.98 ۔۔۔۔۔۔83.98