کورونا کے بعد اب برڈ فلو سے کاروبار متاثر

برڈ فلو پھیلنے کی خبروں سے پولٹری کے کاروباری بھی پریشان ہیں دہلی کے دکانداروں کا کہنا ہے کہ اگر اس بیماری پر قابو نہیں پایا گیا تو اس سے کاروبار کافی متاثر ہوگا۔

کرونا وائرس سے پیدا شدہ بحران کا مقابلہ کرنے کے بعد اب بھارت پر برڈ فلو نے حملہ کیا ہے حالانکہ اب تک مختلف ریاستوں میں برڈ فلو کو لیکر ہائی الرٹ جاری کیا جا چکا ہے۔

بھارت کی مختلف ریاستوں میں گزشتہ کچھ دنوں کے دوران لاکھوں پرندے مر چکے ہیں، اور بھارت کی چار ریاستوں میں برڈ فلو کی باضابطہ تصدیق ہو چکی ہے۔ اس کے بعد حکومت اس نئے بحران پر قابو پانے کے لیے اقدامات کر رہی ہے، قومی دارالحکومت دہلی میں فی الحال کوئی معاملہ سامنے نہیں آیا ہے تاہم دہلی کی مرغا منڈیوں میں مرغے کی فروخت میں غیر معمولی کمی آئی ہے جبکہ قیمت میں بھی کمی دیکھنے کو ملی ہے۔

مرغا کاروباریوں نے ای ٹی وی بھارت سے بات کرتے ہوئے کہا کہ برڈ فلو کی وجہ سے لوگ چکن کھانے سے گریز کر رہے ہیں قیمت میں کافی فرق پڑا ہے جو پہلے 200 روپے کلو مرغا فروخت ہو رہا تھا وہ اب 120 روپے فی کلو ہو رہا ہے۔

اسی سے متعلق ای ٹی وی بھارت کے نمائندے نے دہلی کے ایل این جے پی ہسپتال کے میڈیکل ڈائریکٹر سریش کمار سے بات کی جس میں انہوں نے بتایا کہ برڈ فلو سے بچنے کے لیے ضروری ہے کہ فی الحال مرغا کھانے سے پرہیز کیا جائے۔