صحافی کی پٹائی کرنے کے تعلق سے ایک ویڈیو بھی وائرل ہوا ہے۔
اطلاعات کے مطابق متاثر صحافی امت شرما کی محض اس لیے پٹائی کی گئی کیونکہ انہیں اطلاع موصول ہوئی تھی کہ ٹرین پٹری سے اتر گئی ہے۔
اس سلسلے میں امت شرما کوریج کرنے شاملی ریلوے اسٹیشن پہنچے، جہاں پولیس اہلکاروں نے ان کو پکڑلیا اور ان کی بے رحمی سے پٹائی شروع کردی اور ان کا کیمرہ بھی توڑدیا۔
امت شرما نے پولیس اہلکاروں پر سنگین الزام عائد کرتے ہوئے کہا کہ پولیس اہلکاروں نے پٹائی کرنے کے بعد اسے پیشاب پینے پر بھی مجبور کیا۔
اس سلسلے میں اترپردیس کے ڈی جی پی او پی سنگھ نے ٹویٹ کرتے ہوئے ایس ایچ او جی آر پی شاملی راکیش کمار اور کانسٹیبل سنجے کمار کو معطل کرنے کا حکم جاری کیا ہے۔
واضح رہے کہ اس سے قبل بھی اترپردیش میں صحافیوں کی پٹائی ہوچکی ہے۔ حال ہی میں فری لانس جرنلسٹ پرشانت کنوجیا کو وزیراعلیٰ یوگی آدتیہ ناتھ کے خلاف نازیبا تبصرہ کرنے پر گرفتار کرلیا گیا تھا جس کے بعد سپریم کورٹ نے زبردست پھٹکار لگاتے ہوئے صحافی کو رہا کرنے کا حکم دیا۔
