تیواری کا سیتارمن سے دفاعی بجٹ بڑھانے کامطالبہ

لوک سبھا میں دفاعی بجٹ میں تخفیف پر تشویش ظاہر کرتے ہوئے کانگریس کے سینیئر رہنما منیش تیواری نے وزیر خزانہ نرملا سیتارمن سے اس میں اضافہ کرنے کامطالبہ کیا ۔

کانگریس کے رہنما منیش تیواری نے وقفہ صفر میں یہ معاملہ اٹھاتے ہوئے کہا کہ چین میں دفاعی بجٹ میں مسلسل اضافہ کیا جا رہا ہے لیکن ہمارے یہاں اس میں اسی رفتار سے کمی کی جارہی ہے۔ یہ قومی سلامتی کے لیے شدید تشویش کی بات ہے اور حکومت کو اس پر توجہ دینی چاہیے۔

انہوں نے کہا کہ پہلے دفاعی بجٹ گھریلو پیداوار(جی ڈی پی) کا 1.8 فیصد ہوتا تھا لیکن اب یہ کم ہوکر 1.5 فیصد ہو گیا ہے جبکہ پڑوسی ممالک کے بجٹ میں اضافہ کیا جا رہا ہے۔ اسی طرح سے دفاعی میدان میں کیپیٹل ایکسپینڈیچر (اخراجات) 45.3 فیصد سے گھٹ کر اس حکومت میں اب 31.28 فیصد رہ گیا ہے۔

تیواری نے کہا کہ ان مسائل کو 16ویں لوک سبھا کےدوران تخمینہ کمیٹی (اسٹیمیٹ کمیٹی) نے بھی اٹھایا تھا۔ اس وقت بی جے پی کے رکن پارلیمنٹ مرلی منوہر جوشی تخمینہ کمیٹی کے صدر تھے۔