گائے کے تحفظ کے نام پر بجرنگ دل کے کارکنان کی غنڈہ گردی

ریاست مدھیہ پردیش کے ضلع سیونی میں سخت گیر ہندو جماعت بجرنگ دل کے کارکنان نے گائے کے گوشت کے شک میں دو نوجوان اور ایک خاتون کو مبینہ طور سے تشدد کا نشانہ بنایا۔

بھارتی ریاست مدھیہ پردیش کے ضلع سیونی میں میں گائے کے تحفظ کے نام پر سخت گیر ہندو جماعت بجرنگ دل کے کارکنان غنڈہ گردی پر اتر آئے۔

دراصل مبینہ 'گؤ رکشکوں' کا ایک سنسنی خیز ویڈیو سامنے آیا ہے- ویڈیو میں گاؤ رکشک ایک خاتون اور چند نوجوان کو بے رحمی سے پیٹتے ہوئے نظر آ رہے ہیں-یہ ویڈیو سیونی کے ڈنڈا علاقے کا ہے-
کہا جارہا ہے کہ ایک آٹو میں مبینہ طور سے گائے کا گوشت لے جانے کی خبر ملنے پر خود ساختہ گؤ رکشکوں نے تین لوگوں کو پکڑ لیا اور انہیں پولیس کے حوالے کرنے کے بجائے انہیں لاٹھیوں اور ڈنڈوں سے پیٹنا شروع کر دیا-

بے رحمی کی انتہا تو تب ہوئی جب متاثرہ خاتون کو انہی کے ساتھ کے سفر کر رہے نوجوانوں سے چپل سے پٹوایا گیا-
اتنے پر بس نہیں کیا گیا بلکہ ان تینوں کو جے شری رام کے نعرے لگانے پر مجبور کیا گیا-

موقع پر موجود لوگوں نے اس بات کی معلومات پولیس کو دینے کی ضرورت نہیں سمجھی اور سب ہی تماشہ دیکھتے رہے- پولیس نے مجرمین کے خلاف معاملہ درج کر کے ایک ملزم کو گرفتار کرلیا ہے۔