مظفرپور شیلٹر ہوم کیس کی تحقیقات کررہے سی بی آئی افسر اے کے شرما کے تبادلے کے پیش نظر سپریم کورٹ نے سی بی آئی کے سابق عبوری ڈائریکٹر ایم ناگیشور راؤ کو سخت پھٹکار لگائی ہے۔
اطلاعات کے مطابق چیف جسٹس رنجن گگوئی نے کہا کہ ناگیشور راؤ نے عدالتی احکامات سے کھلواڑ کیا ہے، آپ کو بھگوان ہی بچائیں گے۔
سی بی آئی کے وکیل نے بتایا کہ ایم ناگیشور سمیت دو افسر اے کے شرما کے تبادلے میں شامل تھے۔
عدالت نے کہا کہ سی بی آئی کے عبوری ڈائریکٹر ایم ناگیشور راؤ نے عدالت سے اجازت لیے بغیر مظفر پور شیلٹر ہوم میں لڑکیوں کے ساتھ جنسی تشدد اور ریپ کیس کی تحقیقات کررہے افسر اے کے شرما کا تبادلہ کر دیا، یہ عدالت کی بے عزتی ہے اور اسے ہم قطعی برداشت نہیں کریں گے۔
خیال رہے کہ جب آلوک ورما کو سی بی آئی ڈائریکٹر کے عہدے سے ہٹایا گیا، تب ناگیشور راؤ کو سی بی آئی کی کمان سونپی گئی تھی، اسی دوران انہوں اے کے شرما کا تبادلہ کردیا جبکہ سپریم کورٹ نے ایسا کرنے سے منع کیا تھا۔
واضح رہے کہ اے کے شرما ہی اس وقت مظفر پور شیلٹر ہوم کیس کی جانچ کر رہے تھے۔
غور طلب ہے کہ سپریم کورٹ نے اے کے شرما کے تبادلے کی کارروائی میں شامل سی بی آئی کے سابق ڈائیریکٹر ایم ناگیشور راؤ سمیت دوسرے تمام افسروں کو بھی 12 فروری کو پیش ہونے کے لیے کہا ہے، اور ساتھ میں عبوری ڈائریکٹر ایم ناگیشور راؤ کو ہتک عزت کا نوٹس بھی بھیجا ہے۔
واضح رہے کہ جمعرات کو سپریم کورٹ نے بہار کے مظفر پور شیلٹر ہوم معاملے میں ریاستی حکومت کو سرزنش لگاتے ہوئے معاملے کی سماعت پٹنہ سے دہلی منتقل کرنے کی ہدایت دی ہے۔
عدالت نے معاملے کو پٹنہ سے دہلی کی پاکسو عدالت کو بھیجنے کا حکم دیتے ہوئے دو ہفتے کے اندر معاملے کی سنوائی شروع کرنے اور چھ مہینے کے اندر مکمل کرنے کی ہدایت جاری کی ہے۔
واضح رہے کہ ریاست بہار کے ضلع مظفرپور میں 31 مئی 2018 کو ایک شیلٹر ہوم میں بچیوں کے ساتھ جنسی زیادتی کا معاملہ سامنے آیا تھا، جس کے بعد کچھ بچیوں کے حاملہ ہونے کی بھی تصدیق ہوئی تھی۔
سپریم کورٹ نے بہار کے وزیر اعلیٰ نتیش کمار اور سی بی آئی کی سخت سرزنش کرتے ہوئے کہا کہ یہ بدقسمتی ہے کہ بچیوں کے معاملے میں حکومت غیرسنجیدہ ہے۔
چیف جسٹس گگوئی نے کہا کہ یہ کیس بہار کے مظفر پور سے دہلی کے ساکیت کورٹ کو منتقل کیا جاتا ہے، اتنا ہی نہیں، عدالت نے اس معاملے کی سماعت چھ ماہ کے اندر مکمل کرنے کی ہدایت بھی دی ہے۔ جسٹس گوگوئی نے کہا 'بہت ہو گیا۔ ہم بہار کے چیف سکریٹری (دیپک کمار) کو حکم دیتے ہیں کہ وہ عدالت میں پیش ہوں'۔
