کولگام: دکانداروں اور آٹو رکشا ڈرائیوروں کا احتجاج

ریاست جموں کشمیر کے جنوبی ضلع کولگام میں بس اسٹینڈ کی مجوزہ منتقلی کے خلاف مقامی دکانداروں اور آٹو رکشا ڈرائیوروں نے احتجاج کیا۔

نمائندے کے مطابق مقامی دکانداروں اور آٹو رکشا ڈرائیوروں نے کولگام - اننت ناگ شاہراہ پر دھرنا دیا جس کے سبب کئی گھنٹوں تک ٹریفک کی نقل و حمل متاثر رہی۔

ای ٹی وی بھارت کے ساتھ بات کرتے ہوئے مقامی دکانداروں کا کہنا تھا کہ اس وقت وہ دس سے پندرہ ہزار روپے ماہانہ کرایہ ادا کرتے ہیں، اور اگر بس اسٹینڈ منتقل کیا گیا تو بازار میں آمد و رفت کم ہو جائے گی جس سے انکے روزگار پر برے اثرات مرتب ہونگے۔

اسکے علاوہ انہوں نے موجودہ بس اسٹینڈ کی حد بندی کی بھی مخالفت کی، انکے بقول اس سے گاڑیاں سڑکوں پر ہی رکھی جائیں گی جس سے ٹریفک جام میں مزید اضافہ ہوگا۔

دریں اثناء ایس ڈی پی او کی مداخلت کے بعد احتجاج ختم کیا گیا اور شاہراہ پر ٹریفک بحال ہوا۔