گجرات کانگریس کے لیڈر پریش بھائی دھنانی نے انتخابی کمیشن کے فیصلے کے خلاف عدالت کا دروازہ کھٹکھٹایا ہے۔
کمیشن نے بھارتیہ جنتا پارٹی کے لیڈر امت شاہ اور اسمرتی ایرانی کے لوک سبھا کے لیے منتخب ہونے کے بعد خالی ہونے والی دو سیٹوں پر الگ الگ انتخابات کرانے کا فیصلہ کیا ہے۔
جسٹس دیپک گپتا کی صدارت والی تعطیلی بنچ نے کہا: 'ہم عرضی پر سماعت کل کریں گے۔ یہ معاملہ اہم ہے۔'
مسٹر دھنانی کی جانب سے معاملے کی پیروی کررہے سپریم کورٹ کے سینئر وکیل اور ممبر پارلیمنٹ وویک تنکھا نے عرضی کی سماعت کی اپیل کی تھی۔ جس کے بعد عدالت نے سماعت کے لیے آئندہ روز کی تاریخ مقرر کی ہے۔
مسٹر دھنانی نے اپنی عرضی میں کہا کہ اپنے سیاسی ایجنڈا پور اکرنے کے لیے بی جے پی اور انتخابی کمیشن اس طرح کی چال چل رہی ہے۔ یہ حقیقت میں جمہوریت کے تابوت میں آخری کیل ثابت ہوگا۔