مغربی بنگال میں کورونا وائرس کی دوسری لہر انتہائی بھیانک صورت اختیار کر چکی ہے، ریاست کے تمام اضلاع اس کی زد میں ہے۔ کورونا کے بڑھتے ہوئے کیسز کو دیکھتے ہوئے ریاستی حکومت نے 16 مئی تا 30 مئی تک سخت لاک ڈاؤن نافذ کر دیا ہے تاکہ وبا کو پھیلنے سے روکا جاسکے۔
ریاست کے مختلف علاقوں میں آکسیجن پارلر کا قیام عمل میں لایا جارہا ہے۔ شمالی 24 پرگنہ میں بشیر ہاٹ کے بھاولی میں واقع پولی ٹکنیک کالج کے ایک بلاک کو کورونا مریضوں کے علاج کے لیے سیف ہوم میں تبدیل کردیا گیا۔ بشیر ہاٹ سے ترنمول کانگریس کی رکن پارلیمان نصرت جہاں روحی نے 150 بیڈز پر مشتمل سیف ہوم کا افتتاح انجام دیا۔
بشیر ہاٹ پارلیمانی حلقے میں یہ پہلا سیف ہوم ہے. اس سیف ہوم کی تمام تر ذمہ داریاں اور اخراجات رکن پارلیمان نصرت جہاں روحی اٹھا رہی ہیں۔ افتتاحی تقریب کے بعد رکن پارلیمان نصرت جہاں روحی نے کہا کہ کورونا مریضوں کے علاج کے لیے سیف ہوم کی شدید ضرورت محسوس کی جارہی تھی۔
انہوں نے کہا کہ یہ سیف ہوم ایک چھوٹے اسپتال کے مماثل ہے۔ یہاں مریضوں کو علاج کے لیے تمام ترسہولیات فراہم کی جائیں گی۔ رکن پارلیمان نصرت جہاں روحی نے مزید کہا کہ سیف ہوم کے ساتھ ساتھ ماں کمیونٹی کچن کا بھی افتتاح کیا گیا ہے۔ انہوں نے کہا کہ ماں کمیونٹی کچن کے ذریعہ روزانہ 200 افراد کو کھانا کھلایا جائے گا۔
