فروغ انسانی وسائل کے مرکزی وزیر پرکاش جاوڈیکر نے گزشتہ روز یہ اطلاع دیتے ہوئے کہا کہ ان طلبا کے لیے قومی میڈیکل داخلہ امتحان(نیٹ) کا انعقاد 20مئی کو کیا جائے گا۔
جاوڈیکر نے ٹوئٹ کرکے کہا' یہ اعلان کرتے ہوئے خوشی ہورہی ہے کہ کرناٹک کے جن طلبا کا نیٹ امتحان ٹرین تاخیر ہونے کی وجہ سے چھوٹ گیا تھا انہیں ایک اور موقع ملے گا'
اڑیسہ میں فانی طوفان کی وجہ سے امتحان(نیٹ اڑیسہ) ٹال دیا گیا تھا۔ یہاں بھی 20 مئی کو امتحان کا انعقاد کیا جائے گا۔ اس تعلق سے کرناٹک کے وزیر اعلیٰ ایچ ڈی کمار سوامی نے فروغ انسانی کے مرکزی وزیر پرکاش جاوڈیکر کا شکریہ ادا کیا ہے۔
ایچ ڈی کمار سوامی نے ٹوئٹ کرکے لکھا' درخواست پر غور کرنے اور طلبا کی مدد کرنے پر پرکاش جاوڈیکر آپ کو اور فروغ انسانی وسائل کی وزارت کا شکریہ'۔
یاد رہے کہ ملک بھر کے میڈیکل کالجوں میں داخلہ کے لیے اتوار کونیٹ امتحان(نیٹ ایگزام) کا انعقاد کیا گیا تھا۔ لیکن سیکڑوں طلبا اس امتحان میں شامل ہونے سے محروم رہ گئے کیونکہ امتحان کے لیے پہنچنے کی خاطر مقرر وقت سے ایک گھنٹہ بعد ان کی ٹرین بینگلور پہنچی اور دوسرا بغیر کسی سابقہ اطلاع کے ایک امتحان سینٹر بھی بدل دیا گیا تھا۔
کرناٹک کے سابق وزیر اعلیٰ سدا رمیا نے اتوار کو یہ معاملہ اٹھاتے ہوئے ٹوئٹ کیا تھا۔ انہوں نے اپنے اس ٹوئٹ میں وزیر اعظم نریندر موی کو ٹیگ کیا تھا۔ کمار سوامی نے پیر کو ہی اس معاملے پر کرناٹک کے چیف سکریٹری ٹی ایم وجے بھاسکر اور ہائی ایجوکیشن محکمہ کے افسران کے ساتھ میٹنگ کی تھی۔
