خواتین کمیشن کی چیئرپرسن ریکھا شرما نے پیر کے روز نوٹس جاری کرتے ہوئے کہا کہ یہ انتہائی اشتعال انگیز بیان ہے، عورتوں کے تئيں اعظم خاں کا سلوک ہمیشہ غلط اور ذلت آمیز رہا ہے۔
کمیشن نے اس معاملے میں از خود نوٹس لیا ہے اور انہیں نوٹس جاری کیا ہے۔ کمیشن نے اعظم خاں کو الیکشن لڑنے سے روکنے کے لئے الیکشن کمیشن کو خط بھی لکھا ہے۔
واضح رہے کہ محترمہ جیہ پردا رام پور لوک سبھا سیٹ سے بی جے پی کے ٹکٹ پر انتخابی میدان میں ہیں، اس سے پہلے وہ سماجوادی پارٹی کی لیڈر رہی ہیں۔
قومی خواتین کمیشن نے نوٹس میں کہا ہے کہ اعظم خاں پہلے بھی خواتین کے ساتھ ناروا برتاؤ کرتے رہے ہیں، ان کا تازہ بیان بھی خواتین کے تئيں غیر اخلاقی اور اہانت آمیز اور خواتین کے وقار کے خلاف ہے۔
نوٹس میں کہا گیا ہے کہ"کمیشن ایسے غیر ذمہ دار اور غیر مناسب بیان کی سخت مذمت کرتا ہے، آپ کو اس کا کمیشن کو اطمینان بخش جواب دینا ہو گا"۔
خواتین کمیشن نے الیکشن کمیشن کو لکھے گئے خط میں مسٹر اعظم خاں کا بیان اور مثالی ضابطہ اخلاق کی خلاف ورزی قرار دیاہے، خواتین کمیشن نے الیکشن کمیشن سے اس معاملے کی تہہ تک جانے اور ان کے خلاف کارروائی کی درخواست بھی کی ہے۔
