چھتیس گڑھ: نکسلیوں نے سات گاڑیوں کو نذر آتش کردیا

ایک افسوسناک واقعہ میں چھتیس گڑھ کے شورش زدہ ضلع سکما میں نکسلیوں نے کم سے کم سات گاڑیوں کو نذر آتش کردیا۔ جب کہ اس واقعہ میں کسی بھی ڈرائیور کو کوئی نقصان نہیں پہنچا، سیکیورٹی فورسز موقع پر پہنچ گئیں اور علاقے میں سرچ آپریشن شروع کردیا گیا۔

نکسلیوں کی جانب سے 26 اپریل کو بھارت بند کا اعلان کیا گیا تھا، اس سے ایک دن قبل ریاست چھتیس گڑھ کا شورش سے متاثرہ ضلع سکما میں نکسلیوں کے ایک گروپ نے سات گاڑیوں کو نذر آتش کردیا۔ نکسلیوں کی جانب سے کی گئی اس کارروائی کی سکما کے ایس پی ایل دھروف نے تصدیق کی ہے، انہوں نے کہا کہ یہ واقعہ سکما کے ایرابور علاقے کا ہے جہاں "بھارت بند" سے ایک دن قبل یہ واقعہ پیش آیا۔

ابتدائی معلومات کے مطابق الٹراس کا ایک گروپ اس علاقے میں پہنچا اور ہائی وے پر کھڑی گاڑیوں میں آگ لگادی، ساتھ ہی اس گروپ نے مقامی افراد میں بھارت بند کو کامیاب بنانے کے لئے پرچے بھی تقسیم کیے۔ پولیس نے بتایا کہ اس واقعے میں کسی ڈرائیور کو کوئی نقصان نہیں پہنچا، سیکیورٹی فورسز موقع پر پہنچ گئیں اور علاقے میں سرچ آپریشن شروع کردیا گیا۔

واضح رہے کہ حالیہ دنوں میں نکسلیوں نے سیکیورٹی فورسز پر حملے شروع کرکے ترقیاتی کام مسدود کردیے ہیں اور ان ترقیاتی منصوبوں میں استعمال شدہ گاڑیوں اور مشینوں کو نقصان پہنچاکر سکما سمیت سات اضلاع پر مشتمل ریاست کے بستر ڈویژن میں ترقیاتی کاموں میں خلل ڈالنے کی کوشش کی ہے۔