مذہبی نعروں کے درمیان سالانہ امرناتھ یاترا کے لیے پہلا قافلہ آج جموں کے بھگوتی نگر سے پہلگام اور بال ٹال کے لیے روانہ کیا گیا۔
ریاست جموں و کشمیر کے گورنر کے مشیر کے کے شرما نے ہری جھنڈی دکھاکر اس قافلے کو روانہ کیا، مسافروں کے لیے حفاظت کے سخت اقدامات کیے گئے ۔
یاترا کے پہلے قافلے میں کل 2234 مسافر شامل ہیں۔ جن میں 1839 مرد، 333 خواتین، 17 بچے اور 45 سادھو شامل ہیں۔
اس قافلے میں تقریباً ایک ہزار سے زائد عقیدت مند 45 گاڑیوں میں روانہ ہوئے۔
اسی طرح ضلع اودھم پور میں بھی امرناتھ یاترا کے پہلے قافلے کا استقبال ضلع انتطامیہ و پولیس انتظامیہ نے اودھم پور کے ٹکری کالی ماتا مندر میں زوردار طریقے سے کیا۔
جہاں ڈپٹی کمشنر پیوش سنگلا، ڈی آئی جی سجیت کمار اور دیگر اعلی افسران موجودتھے۔
بابا برفانی کے درشن کے لیےملک کے کونے کونے سے آئے بھگوان شیو کے عقیدت مند کافی پرجوش نظر آئے۔ جن کا کہنا تھا کہ' بھارتی فوج اور سکیوریٹی اہلکاروں کے ہوتے ہوئے انھیں کسی طرح کا خوف نہیں ہے۔
ہر برس کی طرح اس برس بھی امرناتھ یاترا پر جانے والے عقیدت مندوں کے لیے 10دن پہلے ہی قاضی گنڈ بیس کیمپ لگانے والے پہنچ چکے تھے اور ان کے لیے ہر قسم کی تیاریاں مکمل کرلی گئی ہیں تاکہ امرناتھ یاترا کے مسافروں کو کسی قسم کی پریشانی کا سامنا نہ کرنا پڑے۔
کیمپ لگانے والوں نے ای ٹی وی بھارت کو بتایا کہ' سال بھر ہم لوگ اس دن کے انتظار میں رہتے ہیں کہ کب یہ دن آئے اور امرناتھ یاتریوں کی خدمت کرنے کا موقع ملے، ہم لوگ گھر بار چھوڑ کر یاتریوں کے خدمت میں حاضر ہوتے ہیں ۔
ساتھ ہی ساتھ مسافروں کے لیے محکمہ سیر و سیاحت کی جانب سے بھی تیاریاں مکمل کی جاچکی ہیں۔
