ٹرینوں میں تیل مالش کی سہولت

انڈین ریلوے نے اپنے مسافروں کے لیے چلتی ٹرین میں سروں کی چمپی اور پیر کی تیل مالش کی سہولت شروع کرنے کا اعلان کیا ہے۔

مغربی ریلوے کے رتلام ڈویژن نے اندور سے شروع ہونے والی 39 ٹرینوں میں مالش کی سہولت شروع کرنے کا اعلان کیا ہے جن میں مالوہ ایکسپریس، نئی دہلی انٹرسٹی ایکسپریس، اہلیہ نگر ایکسپریس، اونتی ایکسپریس، شکشپرا ایکسپریس، نرمدا ایکسپریس، پینچ ویلی ایکسپریس، اجینی ایکسپریس وغیرہ شامل ہیں۔

ریلوے کے ذرائع کے مطابق رتلام ڈویژن نے جمعہ کو اس طرح کا حکم نامہ جاری کیا ہے۔ ہر گاڑی میں تین سے پانچ تربیت یافتہ مالش کرنے والے تعینات رہیں گے۔ صبح 6 بجے سے رات 10 بجے کے درمیان مسافروں کے مطالبہ پر ان کی نشست پر جاکر سر کی چمپی کریں گے اور پیروں کی تیل مالش کریں گے۔

سر اور پیر کی مالش کے لیے گولڈ اسکیم میں سو روپے، ڈیمانڈ اسکیم میں دو سو روپے اور پلیٹینم اسکیم میں تین سو روپے کی شرح متعین کی گئی ہیں۔

گولڈ اسکیم میں مالش کرنے والا 15 سے 20 منٹ تک زیتون یا کم چپکنے والے تیل سے مالش کرے گا جبکہ ڈیمانڈ اور پلاٹینم اسکیموں میں تیل کے ساتھ کریم اور وائپس کے ساتھ مالش کیے جائیں گے۔

یہ خدمات 15 سے 20 دنوں کے اندر شروع ہوجائے گی۔اگر یہ تجربہ کامیاب رہا تو ملک کے دیگر حصوں کی ٹرینوں کی روٹوں میں بھی یہ منصوبہ شروع کیا جائے گا۔