بانڈی پورہ:'مسجد نور' جل کر راکھ

شمالی کشمیر کے ضلع بانڈی پورہ میں آگ کی ایک ہولناک واردات میں معروف 'مسجد نور' خاکستر ہوگئی ۔

موصولہ اطلاعات کے مطابق بانڈی پورہ قصبے کی ناز کالونی میں واقع مسجد نور کی تیسری منزل سے ہفتہ کی علی الصبح قریب چار بجے آگ نمودار ہوئی جس نے آناً فاناً پوری مسجد کو اپنی لپیٹ میں لے لیا۔

بڑی تعداد میں مقامی لوگ اور فائر ٹینڈرز جائے واردات پر پہنچے۔ اگرچہ وہ آگ کو بستی میں پھیلنے سے روکنے میں کامیاب ہوئے تاہم مسجد کو بڑے پیمانے کے نقصان سے بچا نہ سکے۔

سرکاری ذرائع نے بتایا کہ آگ لگنے کی وجہ فوری طور پر معلوم نہیں ہوسکی۔ انہوں نے بتایا کہ پولیس نے کیس درج کرکے تحقیقات شروع کردی ہیں۔
ایک رپورٹ کے مطابق معروف مسجد نور میں تبلیغی جماعت کا ضلعی مرکز بھی قائم تھا۔