مالیہ، حوالگی کے معاملے میں عرضی دائر کر سکتے ہیں

برطانیہ میں لندن کی عدالت نے مفرور شراب کاروباری وجے مالیہ کی اپیل پر منگل کو سماعت کرتے ہوئے بڑی راحت دی ہے۔ لندن کے رائل کورٹ آف جسٹس نے انہیں اپنی حوالگی کے خلاف عرضی دائر کرنے کی اجازت دے دی ہے۔

مالیہ بھارت میں دھوکہ دہی اور منی لاؤنڈرنگ کے الزامات میں مطلوب ہیں۔ اگر عدالت کا فیصلہ ان کے خلاف جاتا ہے تو مالیہ کو 28 دنوں کے اندر بھارت کے حوالے کرنا پڑتا۔

وجے مالیہ نے آج عدالت میں کہا کہ 'میں خوش ہوں کہ میں پہلی نظر میں اپنی جیت دیکھ رہا ہوں۔ یہ بدقسمتی کی بات ہے کہ بھارت میں اگر کوئی تجارت میں ناکام رہتا ہے تو پرموٹر پر دھوکہ دہی کا الزام لگایا جاتا ہے'۔

مالیہ نے اپنی صفائی میں کہا ہے بھارتی حکومت کی جانب سے مجھ پر جھوٹے الزامات لگائے گئے ہیں جس کی کوئی بنیاد نہیں ہے۔

لندن میں رائل کورٹ آف جسٹس کے عدالتی ڈویژن کی دو ججوں کی بنچ نے اپریل میں دائر عرضی پر سماعت کی تھی۔ معاملے کی سماعت کے لئے عدالت میں داخل ہونے سے پہلے مالیہ نے کہا تھا کہ وہ اچھا محسوس کررہے ہیں۔