ممبئی کی لوکل ٹرین میں سفر وبال جان

ممبئی کی لوکل ٹرینز میں آج کل ایک ایسا گروہ متحرک ہے جو مسافروں کا موبائل اور پرس چھین کر فرار ہو جاتا ہے۔

ریاست مہاراشٹر کے دارالحکومت ممبئی میں زندگی کی رفتار کے ساتھ دوڑنے والی لوکل ٹرین سے سفر کرنا جان جوکھم میں ڈالنے جیسا ہے، اور اگر آپ دروازے کے پاس کھڑے ہو کر سفر کرتے ہیں تو اور بھی زیادہ خطرناک ہے کیوں کہ ممبئی پولیس نے ایک ایسے گینگ کو گرفتار کیا ہے جو دروازوں پر کھڑے ہونے والے مسافروں کو اپنا شکار بناتے تھے۔

ممبئی ریلوے پولیس کی گرفت میں دو ایسے نوجوان آئے ہیں جن کا تعلق 'پھٹکا' گینگ سے ہے۔ ان پر الزام ہے کہ آٹھ اپریل کو ان لوگوں نے اپنے گروہ کے ساتھ مل کر ناہور ریلوے سٹیشن پر چلتی ٹرین میں ایک خاتون کو نشانہ بنایا اور اس خاتون کا موبائل فون چھین کر فرار ہوگئے تھے۔

پولیس کی تحقیقات میں معلوم ہوا ہے کہ یہ دونوں پھٹکا گینگ کے رکن ہیں اور ممبئی کے باندرا علاقے کے رہنے والے ہیں، ان کا یہی کام ہے کہ چلتی ٹرین پر مسافروں کو ڈنڈے سے مار کر ان کے فون چھین کر بھاگ جاتے ہیں۔

انہوں نے ممبئی سینٹرل سے ورار گیٹ سی ایس ٹی سے کلیان جانے والی لوکل ٹرین میں متعدد بار اس طرح کی وارداتیں انجام دی ہیں۔

فی الحال ممبئی ریلوے پولیس اس گینگ کے دو لوگوں کو گرفتار کرکے تفتیسش کر رہی ہے۔