آئی پی ایل: کیا ممبئی جیت کی پٹری پر لوٹے گی؟

آئی پی ایل میں آج چینئی سپر کنگز اور ممبئی انڈینز کے مابین مقابلہ ممبئی کے وانکھیڈے اسٹیڈیم میں کھیلا جائے گا، میچ رات 8 بجے شروع ہوگا۔

آئی پی ایل کے 12 ویں سیزن میں آج دو بہترین ٹیموں کے مابین زبردست مقابلے کی توقع کی جارہی ہے۔ ایک جانب آئی پی ایل کی سب سے کامیاب ٹیم چینئی سپر کنگز ہے تو دوسری جانب 3 بار کی چیمپیئن ممبئی انڈینز ہے۔

ممبئی انڈیئنز کو اپنے گھریلو میدان پر کھیلنے کا فائدہ مل سکتا ہے لیکن اس کی راہ اتنی آسان نہیں ہے کیوںکہ سامنے چینئی سپر کنگز جیسی مضبوط ٹیم ہے۔

پوائنٹس ٹیبل میں چینئی سپر کنگز پہلے مقام پر قابض ہے جبکہ ممبئی انڈیئنز ساتویں نمبر پر ہے۔

چینئی سپر کنگز رواں سیزن میں ابھی تک غیر مفتوح رہی ہے اس ٹیم نے ابھی تک 3 میچ کھیلے ہیں اور تمام میں ہی جیت درج کی ہے۔

چینئی سپر کنگز کے کپتان مہیندر سنگھ دھونی کا فارم میں لوٹ آنا ٹیم کے لیے خوش آئند ہے۔ دھونی نے پچھلے میچ میں 75 رنوں کی شاندار اننگ کھیلی تھی۔ اس کے علاوہ امباتی رائیڈو، شین واٹسن، سریش رائنا، کیدار جادھو، ڈوین براوو اور رویندر جڈیجہ جیسے کھلاڑی بھی موجود ہیں۔

دوسری جانب ممبئی انڈیئنز کے لیے یہ بات مشہور ہے کہ وہ سست شروعات کرتی ہے لیکن فارم حاصل کرنے پر براہ راست پلے آف میں ہی جا کر دم لیتی ہے۔ ممبئی اپنی پچھلی شکست کو بھلا کر کامیابی کی پٹری پر لوٹنا چاہے گی۔

واضح رہے کہ ممبئی انڈیئنز کو اپنے پچھلے میچ میں کنگز الیون پنجاب کے ہاتھوں شکست کا سامنا کرنا پڑا تھا۔

ممبئی انڈیئنز میں کپتان روہت شرما، کوئینٹن ڈی کاک، سوریہ کمار یادو، یوراج سنگھ، کیرون پولارڈ اور ہاردک پانڈیا جیسے دھواں دھار بلے باز موجود ہیں جبکہ جسپریت بمراہ، لستھ ملنگا، مشیل میک کلینیگھن اور مینک مرکنڈے جیسے بہترین گیندباز موجود ہیں جو کسی بھی ٹیم کی بلے بازی لائن اپ تہس نہس کر سکتے ہیں۔

جسپریت بمراہ ان میں قابل ذکر ہیں جو مسلسل ڈیتھ اوورز میں بہترین گیند بازی کر رہے ہیں۔

اب یہ دیکھنا دلچسپ ہوگا کہ ممبئی اپنے گھریلو میدان پر جیت درج کرتی ہے یا پھر دوبارہ اسے شکست ہوتی ہے۔