'شاہراہ کی بندش، یہ کیسا پاگل پن ہے'

جموں وکشمیر میں حکام نے آج پہلی بار قومی شاہراہ عام لوگوں کے لیے بند کردی ہے تاکہ صرف سیکورٹی فورسز کی گاڑیاں سفر کرسکیں۔

وزارت داخلہ نے گزشتہ ہفتے ایک حکمنامہ جاری کیا تھا جس کے مطابق ہفتے میں دو دن سرینگر جموں شاہراہ پر صرف سکیورٹی کانوائز کو چلنے کی اجازت ہوگی۔

اس فیصلے کے خلاف عوام اور مقامی قیادت نے سخت ردعمل ظاہر کیا ہے۔

سابق وزیر اعلی محبوبہ مفتی کا کہنا ہے کہ 'یہ کیسا پاگل پن ہے۔ مجھے امید ہے کہ اس حکم کو فوری برخواست کردیا جائے گا کیوں کہ مجھے نہیں لگتا کہ یہ فائدہ مند ثابت ہوگا۔ ایسا محسوس ہوتا ہے کہ گورنر انتظامیہ عوام کو سڑک پار کرنے جیسے جیسے چھوٹے چھوٹے کاموں سے روک کر سزا دینا چاہتا ہے'۔

دوسری جانب حکام کا کہنا ہے کہ یہ فیصلہ فروری میں لیتہ پورہ پلوامہ میں ہوئے خود کش حملے کے پس منظر میں اٹھایا گیا ہے۔ اس حملے میں 40 سے زائد سی آر پی ایف اہلکار ہلاک ہوگئے تھے۔