'مودی لہر دکھانے کے لیے ایگزٹ پول'

کرناٹک کے وزیراعلیٰ نے بی جے پی پر الزام عائد کیا کہ وہ ایگزٹ پول کے ذریعہ ملک میں مودی لہر دکھانا چاہتے ہیں۔

ریاست کرناٹک کے وزیراعلی ایچ ڈی کمارسوامی نے بھارتی جنتا پارٹی (بی جے پی)پر یہ الزام لگایا کہ وہ ایگزٹ پول کے ذریعہ ملک میں مودی لہر دکھانے کے ساتھ ہی مرکزمیں اگلی حکومت بنانے کے لیے سیٹوں کی کمی کے پیش نظر چھوٹی پارٹیوں تک پہنچنے کی کوشش کررہی ہے۔

جنتادل (سیکولر)کے رہنما نے کہا کہ 23 مئی کو الیکشن کے نتیجہ آنے کے بعد سیٹوں کی کمی کو پورا کرنے کے لیے بی جے پی مصنوعی طور پر بنائی گئی مودی لہر کا استعمال علاقائی پارٹیوں کو متوجہ کرنے کے لیے کررہی ہے۔

کمارسوامی نے اپنے ٹوئٹ میں کہاکہ 'تمام اپوزیشن پارٹیوں نے وزیراعظم کے تابع ای وی ایم کے مصدقہ ہونے پر تشویش ظاہر کی ہے'۔

وزیراعلی کا یہ ٹوئٹ سوشل میڈیا پر پیر کو وائرل بھی ہوگیا۔