ملیگاؤں بم بلاسٹ کی ملزمہ سادھوی پرگیہ سنگھ ٹھاکر پر نثار سعید نے لوک سبھا انتخابات میں حصہ لینے پر روک لگانے کی اپیل کی ہے، جس کے لیے سعید نے این آئی اے کی خصوصی عدالت میں ایک عرضی داخل کی ہے۔
خیال رہے کہ مالیگاؤں بم بلاسٹ میں اپنے بیٹے کو کھونے والے نثار سعید نے عدالت سے کہا ہے کہ 'پرگیہ طبی بنیاد پر ضمانت پر ہیں، اگر وہ شدید گرمی میں بھی انتخابات میں حصہ لینے کے لیے صحت مند ہیں تو پھر انہوں نے عدالت کو گمراہ کیا ہے'۔
واضح رہے کہ بدھ کے روز بی جے پی نے پرگیہ کو مدھیہ پردیش کی دارالحکومت بھوپال سے لوک سبھا کے ٹکٹ پر کانگریس کے قد آور رہنما دِگ وجے سنگھ کے خلاف انتخابی میدان میں اتارا ہے۔
یاد رہے کہ مالیگاﺅں بم دھماکہ 2008 کی ملزمہ سادھوی پرگیہ سنگھ ٹھاکر کو این آئی اے کی ایک خصوصی عدالت نے نوٹس جاری کیا تھا۔
عدالت نے نوٹس میں کہا تھا کہ وہ جلد از جلد اس معاملے میں جواب داخل کریں ،کیونکہ بم دھماکے میں ہلاک ہونے والے ایک شخص کے والد نے سادھوی کے بھوپال سے بی جے پی کے ٹکٹ پر الیکشن لڑنے کے خلاف عدالت سے رجو ع کیا ہے۔
واضح رہے کہ گزشتہ روز پرگیہ سنگھ نے بی جے پی میں شمولیت اختیار کی اور پارٹی نے فوری طور پر انہیں بھوپال سے کانگریس رہنما دگ وجے سنگھ کے خلاف امیدوار بنانے کا اعلان بھی کردیا تھا۔
خیال رہے کہ بھوپال کی پارلیمانی سیٹ اس لیے بھی اہم ہے کیوں کہ یہاں قریب پانچ لاکھ 10 ہزار مسلم ووٹ ہے۔
