جموں کی تپتی گرمی میں چنارکا درخت باعث راحت

ایک زمانے میں چنار کے درخت صرف وادی کشمیر میں ہی پائے جاتے تھے تاہم اب محکمہ پھول بانی نے جموں میں بھی چنار کے کئی درخت اُگائے ہیں۔

ریاست جموں و کشمیر کی گرمائی دارالحکومت کشمیر کا موسم خوشگوار اور درجہ حرارت میں اعتدال ہوتا ہے وہیں سرمائی دارالحکومت جموں کا موسم گرم اور شدت کی تپش ہوتی ہے۔

اسی تناظر میں جموں انتظامیہ نے چنار درخت کی خصوصیت کو دیکھتے ہوئے جموں میں بھی چنار ہر چہار سو لگانے کا عزم کیا ہے۔ اور سرمائی راجدھانی کے مختلف صحت افزا مقامات کے ساتھ ساتھ کئی باغات اور پارکوں میں چنار کے درختوں کو لگانے کی مہم شروع کی گئی ہے۔

انتظامیہ کی اس مثبت کوشش کو دیکھتے ہوئے لوگ بھی اس طرح کے اقدام پر کافی خوش اور مطمئن نظر آ رہے ہیں۔

لوگوں کا کہنا ہے کہ چنار کی چھائوں میں جموں کی اس پتتی گرمی سے انہیں راحت کے چند لمحات گزارنے کا موقع فراہم ہو رہا ہے۔

جہاں جموں کے لوگ چنار کے سائے تلے ٹھنڈی ہوائوں سے لطف اندوز ہو رہے ہیں وہیں دوسری جانب جموں کی خوبصورتی اور سیاحت کے لئے بھی ایسے اقدامات سود مند ثابت ہو رہے ہیں۔

واضح رہے کہ جموں میں چنار کے درخت کئی جگہوں پر دیکھے جا سکتے ہیں جن میں جموں یونیورسٹی اور مشہور باغ ’’باغ بہو‘‘ بھی شامل ہیں۔