بی جے پی رکن اسمبلی گرفتار

ریاست تلنگانہ کے دار الحکومت حیدرآباد کے علاقے عنبر پیٹ میں مسجد کی تعمیر کے لیے ملبے کو صاف کرنے کے دوران بی جے پی کے رکن اسمبلی راجہ سنگھ کو ہنگامہ آرائی کرنے پر گرفتار کیا گیا۔

حیدرآباد کے علاقہ عنبر پیٹ کی منہدم شدہ قدیم یکخانہ قطب شاہی مسجد کی جگہ پر دوبارہ مسجد کی تعمیر کے لیے اتوار کے روز ملبہ صاف کیا جارہا تھا کہ اس دوران شرپسندوں نےاعتراض کیا اور ہنگامہ کرتے ہوئے ملبے کو صاف کرنے والے افراد اور پولیس جمعیت پر سنگباری کی۔ جس کے بعد علاقہ میں حالات کشیدہ ہوگئے۔

سنگباری میں 6 مسلم نوجوان اور ایک انسپکٹر اور ایک کانسٹبل بھی زخمی ہوگئے۔ زخمی انسپکٹر کی شناخت ایس ایچ او کاچی گوڑہ ایس جانکی ریڈی کی حیثیت سے کی گئی۔رکن اسمبلی یاقوت پورہ سید احمد پاشاہ قادری، رکن اسمبلی عنبر پیٹ کے وینکٹیش، صدرنشین وقف بورڈ محمد سلیم اور دیگر قائدین نے مسجد کی اراضی کا معائنہ کیا۔بعد ازاں بی جے پی کے رکن اسبملی راجہ سنگھ بھی کچھ دیر بعد وہاں پہنچ گئے اور مسجد کی دوبارہ تعمیر پر احتجاج کرتے ہوئے پولیس پر برہمی کا اظہار کیا اور نوجوانوں کو اکسانے کی کوشش کی جس پر انہیں گرفتار کرلیا گیا۔کمشنر انجنی کمار کی قیادت میں موجود پولیس جمعیت نے حالات کو قابو میں کیا۔