'غریب لڑکیوں کو تعلیم یافتہ بنانا اصل مقصد'

مسلم پسماندہ سماج اب بیدار ہو رہا ہے اور ان میں تعلیم کے تئیں دلچسپی پیدا ہورہی ہے۔ ان کی بچیوں کو زیور تعلیم سے آراستہ کرنے کے لیے سماجی تنظیمیں نمایاں کردار ادا کر رہی ہیں۔

ایسا ہی ایک کارنامہ ریاست اترپردیش کے شہر میرٹھ کے 'بگ ہیومن ویلفیئر سوسائٹی' نے کیا، جس نے 20 غریب لڑکیوں کی تعلیمی اخراجات کی ذمہ داری لی تھی، جو آج اعلیٰ تعلیم حاصل کرنے کی جانب گامزن ہیں۔

واضح رہے کہ اُمِّ ادیبہ نے اسی امدادی تنظیم کی مدد سے بی ایس سی سال اول تک پہنچی ہیں، جو اب خود گھر گھر جاکر غریب لڑکیوں کو بلا معاوضہ تعلیم دے رہی ہیں۔

ادیبہ کا کہنا ہے کہ 'پڑھیں گی لڑکیاں تبھی تو بڑھیں گی لڑکیاں' اس لیے تعلیم بہت ضروری ہے'۔

رفاہی تنظیم بگ ویلفیئر سوسائٹی کے سکریٹری یوسف سلطان کا کہنا ہے کہ یہ تنظیم غریب بچیوں کی تعلیم پر کام کر رہی ہے جس کی مدد سے اب تک 30 بچیوں کو تعلیم یافتہ بنانے میں کامیابی ملی ہے، اور آگے بھی یہ کوشش جاری رہے گی۔

خیال رہے کہ ہر برس نوچندی میلے کے موقع پر ایک پروگرام کا انعقاد کیا جاتا ہے جس میں ان لڑکیوں کی حوصلہ افزائی کے لیے انعامات و اعزازات سے نوازا جاتا ہے۔