نوجوان اہربل آبشار میں گرنے سے ہلاک

شعیب احمد ڈار ولد شبیر احمد ڈار ساکن شانگس نوگام اننت ناگ اہر بل آبشار اپنے دوستوں کے ساتھ گھومنے گیا تھا۔ اس دوران وہ اچانک آبشار میں گر گیا۔

جموں و کشمیر کے جنوبی ضلع کولگام کے دمحال ہانجی پورہ علاقے میں منگل کو اس وقت کہرام مچ گیا جب 22 سال کا نوجوا ن اچانک سیاحتی مقام اہربل کے آبشار میں گر کر ہلاک ہوگیا۔

تفصیلات کے مطابق شعیب احمد ڈار ولد شبیر احمد ڈار ساکن شانگس نوگام اننت ناگ اہر بل آبشار اپنے دوستوں کے ساتھ گھومنے گیا تھا۔ اس دوران وہ اچانک آبشار میں گر گیا۔ 22 سال کے نوجوان کی آبشار میں گرنے کی خبر پھیلتے ہی وہاں بچاﺅ کارروائی شروع کر دی گئی تھی۔ تاہم مذکورہ نوجوان موقع پر ہی دم توڑ بیٹھا۔ بعد ازیں اس کی لاش آبشار سے بر آمد کی گئی۔

پولیس کے ایک سینیئر افسر نے اس کی تصدیق کرتے ہوئے بتایا کہ نوجوان کی لاش کو لواحقین کے سپرد کر دیا گیا ہے۔ ادھر جیسے ہی نوجوان کے آبائی علاقے میں یہ خبر پھیل گئی تو وہاں صف ماتم بچھ گئی اور مہلوک نوجوان کے والدین پر اس کا کافی گہرا صدمہ ہے۔

مہلوک نوجوان میڈیسن کی تعلیم حاصل کر رہا تھا۔