'میرا کھل گیا اسکول، میں تو پڑھنے جاؤں گی'، ترانہ وائرل

تعلیم نسواں کی اہمیت اور افادیت پر میوات کی دو مسلم طالبات کی آواز میں ایک ترانہ سوشل میڈیا پر وائرل ہو رہا ہے۔

پہاڑی تحصیل کے گاؤں پپرولی میں واقع سرکاری اسکول میں زیر تعلیم یہ طالبات سگی بہنیں ہیں۔ تعلیم نسواں کی اہمیت پر ان کے گیت کو خوب پسند کیا جا رہا ہے۔

اس گیت کے بول اس طرح ہیں۔' میرا کھل گیا اسکول، میں تو پڑھنے جاؤں گی،میں نے کیا ارادہ سب سے زیادہ نمبر لاؤں گی،ہماری دنیا میں پڑھائی کاکوئی نہیں جواب،ہمیں جینے کی تہذیب سکھاتی ہیں کتاب،میں تو ایک دن کی غیر حاضری نہیں کرواؤں گی،میں تو ڈاکٹر بنوں گی، تیرا نام بڑھاؤں گی۔' ریاست ہریانہ سمیت میوات کے سبھی اسکول کھل چکے ہیں، یہاں کے سرکاری اسکولوں میں طلبا کی حاضری بہت کم رہتی ہے۔بچوں میں تعلیم کے تئین دلچسپی پیدا کرنے کے لیے مڈل اسکول پپرولی کے پرنسپل نانک چند شرما نے اس ترانے کو لکھا ہے اور اپنی دو شاگردوں مسکان اور ثانیہ خان کی آواز میں اسے پیش کیا ہے۔اسکول میں طلبا کی حاضری میں اضافہ کرنے کے لیے اساتذہ گاؤں۔گاؤں جا کر لوگوں کو سمجھا رہے ہیں کہ وہ اپنے بچوں کو اسکول بھیجیں۔سرکاری اسکولوں میں مفت تعلیم، مفت کتاب اور ایک وقت کا کھانا بھی ریاستی حکومت نے مفت کر رکھا ہے، جو طلبا اچھے نمبرات لاتے ہیں ان کو لیپ ٹاپ، سائیکل بھی بطور انعام نوازا جاتا ہے۔

ویسے میوات کا علاقہ جرائم، ٹھگی، لوٹ اور چوری کی وارداتوں کے لیے بدنام رہاہے، جہاں تعلیمی معیار کافی کم ہے۔
میوات کا علاقہ تعلیم کے میدان میں بہت پیچھے ہے، اور اگر بات لڑکیوں کی تعلیم کی ہو تو یہ اور بھی مایوس کن ہے۔
ایسے میں امید کی جاسکتی ہے کہ ان طالبات کے ذریعے گایا ہوا ترانہ یہاں کے لوگوں میں تعلیمی بیداری پیدا کرے گا۔