قانون ساز کونسل کے سابق رکن غلام رسول بلیاوی خطاب کرتے ہوئے نوادہ: بہار کے وزیر اعلیٰ نتیش کمار کی پارٹی جے ڈی یو کے رہنما غلام رسول بلیاوی نے یوگا گرو رام دیو اور دھیریندر شاستری پر تنقید کی۔ انہوں نے بابا رام دیو کو غیر ملکی قرار دیتے ہوئے کہا کہ ان کی جائیداد کی تحقیقات ہونی چاہیے۔ نوادہ میں ایک پروگرام سے خطاب کرتے ہوئے بلیاوی نے باگیشور دھام کے بابا دھیریندر شاستری پر بھی سخت حملہ کیا۔ جے ڈی یو کے سابق ایم ایل سی غلام رسول بلیاوی نے کہا کہ رام دیو بھارتی نہیں ہیں۔ اس کا تعلق شدت پسند تنظیم لشکر طیبہ یا جیش محمد سے ہے۔ اس کے بعد بلیاوی نے رام دیو کو امریکی خفیہ ایجنسی سی آئی اے کا ایجنٹ بھی کہا۔ انہوں نے کہا کہ رام دیو بھارت کب آئے، کیسے آئے اور اتنا قرضہ کیسے لیا، اس کی بھی تحقیقات ہونی چاہیے۔
مزید پڑھیں:۔Ramdev's Comment Sets Off Controversy یوگا گرو بابا رام دیو کا متنازعہ بیانات سے پرانا رشتہ
حال ہی میں سرخیوں میں آئے باگیشور دھام کے بابا دھیریندر شاستری کو غلام رسول بلیاوی نے بہروپیا قرار دیا۔ انہوں نے کہا کہ ایسے نقالی کرنے والوں کی ہمارے ملک میں کوئی جگہ نہیں ہے۔ کپڑے اور میک اپ سے ملک کو کوئی گمراہ نہیں کر سکتا۔ انہوں نے وزیر اعظم نریندر مودی کو نشانہ بناتے ہوئے کہا کہ اگر وزیر اعظم نریندر مودی پاکستان کے ساتھ ڈیل کرنے سے ڈرتے ہیں تو فوج میں 30 فیصد مسلم نوجوانوں کو جگہ دیں، پاکستان ایک آنکھ نہیں دکھا سکے گا۔ ساتھ ہی بلیاوی نے کہا کہ جب پاکستان میزائل بنا کر بھارت کو دکھا رہا تھا تو صرف ایک مسلمان کا بیٹا سامنے آیا جس کا نام اے پی جے عبدالکلام تھا، صرف اس نے پاکستان کو جواب دیا۔ بلیاوی نے مسلم سیفٹی قانون نافذ کرنے کا بھی مطالبہ کیا۔
