میرٹھ:چودھری چرن سنگھ یونیورسٹی میں منعقد آیوروید مہاسمیلن سے خطاب کرتے ہوئے نائب صدرجمہوریہ نے کہا کہ بھارت آج دنیا کی سب سے زیادہ فعال جمہوریت ہے۔اس کے بعد بھی کچھ لوگ الزام لگاتے ہیں کہ دنیا کے سب سے بڑے جمہوریت کی پارلیمنٹ میں مائیک بند کردیا جاتا ہے۔ اس سے بڑا جھوٹ اور کچھ نہیں ہوسکتا۔ آج راجیہ سبھا کا چیئرمین ہونے کی وجہ سے مجبورا مجھے کہنا پڑرہا ہے کہ بھارت کی پارلیمنٹ میں مائیک بند نہیں ہوتا ہے۔ ہاں ایک وقت تھا۔ کالا باب تھا وہ ایمرجنسی کا وقت تھا۔
انہوں نے کہا کہ پارلیمنٹ اور قانون ساز اسمبلیوں کا طرز عمل مثالی ہونا چاہیے۔ وہاں کوئی خلل نہیں ہونا چاہیے۔ لیکن یہ کیسے ہوگا، اس کے لیے آپ سب کو ایک عوامی تحریک چلانی ہوگی۔ اس عظیم ملک کی حصولیابیوں کی توہین کرنے والوں کا احتساب کرنا ہوگا۔ میں نے اپنے دو غیر ملکی دوروں میں دیکھا ہے کہ جب میں اپنا تعارف کرواتا ہوں تو لوگ مجھے عزت کی نگاہ سے دیکھتے ہیں، یہی آج کے بھارت کی طاقت ہے۔ اب بھی کچھ لوگ بیرون ملک میں بھارت کو بدنام کر رہے ہیں۔ ہماری تاریخ ہزاروں سال پرانی ہے، ہم عظیم قوم ہیں، ہمارے لوگ عظیم ہیں۔
نائب صدر جمہوریہ نے کہا کہ آج ملک کی سوچ میں تبدیلی آئی ہے، دھارے میں بھی تبدیلی آئی ہے۔ آج بھارت کہاں ہے، جو کبھی سوچا بھی نہیں تھا، جس کا تصور بھی نہیں تھا۔ آج بھارت میں وہی ہورہا ہے۔ آج کی ترقی دیکھیں، آج بھارت بدل گیا ہے۔ بھارت نے جس طرح کووڈ سے نمٹا ہے اس کی پوری دنیا میں تعریف کی گئی ہے۔ کچھ لوگ اس بات کو قبول نہیں کر سکے کہ بھارت نے اپنی ویکسین خود بنائی ہے۔ آج ہم نے 220 کروڑ ویکسین کی خوراکیں دی ہیں، اور ان کی ڈیجیٹل میپنگ کی گئی تھی۔ دنیا نے یوگا کی طاقت دیکھی، پوری دنیا نے اس کی حمایت کی۔ آیوروید نے کووڈ کے دوران اپنی صلاحیت کو ثابت کیا۔ ہماری ثقافت کا واضح پیغام ہے کہ پہلی خوشی صحت مند جسم ہے۔
دھنکھڑ نے کہا کہ میں کافی عرصہ پہلے رام دیو جی سے ملا تھا، میں نے ان سے کہا کہ وہ مجھے ایسا طریقہ بتائیں کہ دونوں فریقوں کے وکیل پرسکون ذہن کے ساتھ عدالت میں آئیں۔ آج آچاریہ بالکرشن جی یہاں موجود ہیں، مشہور آیورویداچاریہ موجود ہیں۔ راجیہ سبھا کا چیئرمین ہونے کے ناطے میں کچھ کہنا چاہتا ہوں کہ آپ ایسی دوا بنائیں تاکہ پارلیمنٹ کا وقار خود برقرار رہے۔ ہماری دستور ساز اسمبلی نے تین سال تک بہت سے پیچیدہ اور منقسم مسائل پر بحث کی، انہیں حل کیا لیکن تین سال کے طویل عرصے میں کوئی خلل نہیں پڑا، کوئی ویل میں نہیں آیا، کوئی پلے کارڈز نہیں دکھائے گئے۔