چین، روس، سری لنکا اور نیپال کے صدور سمیت کئی عالمی رہنماؤں نے بھارت کی نئی صدر دروپدی مرمو Droupadi Murmu کو مبارکباد دی ہے اور بھارت کے ساتھ اپنے اپنے ممالک کے کثیر جہتی تعلقات کو بڑھانے کے لیے ان کے ساتھ مل کر کام کرنے کی خواہش کا اظہار کیا ہے۔ چینی صدر شی جن پنگ نے پیر کو 64 سالہ مرمو کو عہدہ سنبھالنے پر مبارکباد دیتے ہوئے کہا کہ چین اور بھارت ایک دوسرے کے اہم پڑوسی ہیں اور یہ کہ ایک صحت مند اور مستحکم چین بھارت تعلقات دونوں ممالک کے بنیادی مفادات کے ساتھ ساتھ خطے اور دنیا بھر میں امن و استحکام پر مبنی ہے۔ شی نے کہا کہ وہ چین بھارت تعلقات کو بہت اہمیت دیتے ہیں اور سیاسی باہمی اعتماد کو بڑھانے، عملی تعاون کو گہرا کرنے، اختلافات کو صحیح طریقے سے سنبھالنے اور دو طرفہ تعلقات کو صحیح راستے پر آگے بڑھانے کے لیے مرمو کے ساتھ کام کرنے کے لیے تیار ہیں۔
دروپدی مرمو نے پیر کے روو پارلیمنٹ کے سنٹرل ہال میں ملک کے 15ویں صدرجمہوریہ کے بطور حلف لیا۔وہ ملک کی دوسری خاتون اور قبائلی برادری کی پہلی لیڈر ہیں جو ملک کے اس اعلیٰ ترین آئینی عہدے پر پہنچی ہیں۔ چیف جسٹس این وی رمن نے محترمہ مرمو کو اپنے عہدے کا حلف دلایا۔ محترمہ دروپدی مرمو آزاد ہندوستان میں پیدا ہونے والی ملک کی پہلی اور سب سے کم عمر صدرجمہوریہ ہیں۔ انہوں نے سبکدوش ہونے والے صدر رام ناتھ کووند کی میعاد پوری ہونے کے بعد یہ عہدہ سنبھالا ہے۔
یہ بھی پڑھیں:
Draupadi Murmu Speech After Oath: صدر کے عہدے پر پہنچنا میری نہیں بلکہ ہر غریب کی کامیابی ہے: مُرمو
PM Modi on Droupadi Murmu: وزیر اعظم نے صدر جمہوریہ دروپدی مرمو کو نیک خواہشات پیش کیں
روسی صدر ولادیمیر پوتن نے بھی مرمو کو مبارکباد دی اور امید ظاہر کی کہ وہ دو طرفہ نتیجہ خیز تعاون کو مزید فروغ دیں گی۔ ہم بھارت کے ساتھ خصوصی مراعات یافتہ اسٹریٹجک شراکت داری کے تعلقات کو بہت اہمیت دیتے ہیں۔ پوتن نے کہا کہ مجھے امید ہے کہ ریاست کے سربراہ کی حیثیت سے آپ کی سرگرمیاں ہمارے دوست ممالک کے فائدے اور مضبوط بین الاقوامی استحکام و سلامتی کے مفادات کے لیے روس-بھارت سیاسی مذاکرات اور مختلف شعبوں میں نتیجہ خیز تعاون کو مزید فروغ دیں گی۔
سری لنکا کے نومنتخب صدر رانیل وکرما سنگھے نے بھی مرمو کو مبارکباد دی، وکرما سنگھے نے اپنے پیغام میں لکھا کہ سب سے بڑی جمہوریتوں میں سے ایک میں، اس اہم ذمہ داری کے لیے آپ کی تقرری اس اعتماد کی گواہی ہے جو حکومت اور عوام نے آپ کی صلاحیت اور سیاسی ذہانت پر رکھی ہے۔ دونوں ممالک کے درمیان قریبی تعلقات کو یاد کرتے ہوئے، وکرماسنگھے نے کہا، آپ کی قیادت ہماری مشترکہ کوششوں کو فروغ دینے اور مضبوط بنانے کے لیے ان خوشگوار تعلقات کو فروغ دیتی ہے اور میں اس مقصد کے لیے آپ کے ساتھ مل کر کام کرنے کا منتظر ہوں۔ تجربہ کار سیاست دان وکرماسنگھے نے 21 جولائی کو سری لنکا کے آٹھویں صدر کے طور پر حلف اٹھایا۔
مالدیپ کے صدر ابراہیم محمد صالح نے مرمو کو ان کے تاریخی انتخاب پر مبارکباد دی۔ ان کی قابلیت اور تجربہ بلاشبہ بھارت کو مزید بلندیوں تک لے جائے گا۔ میں ان کی قیادت میں مالدیپ اور ہندوستان کے درمیان قریبی تعلقات کو بڑھانے کا منتظر ہوں۔ نیپال کی صدر بدیا دیوی بھنڈاری نے مرمو کو اپنی نیک خواہشات کا اظہار کیا اور اس اعتماد کا اظہار کیا کہ ان کے دور میں ہمارے دونوں ممالک کے درمیان تعاون نئی بلندیوں تک پہنچے گا۔ نیپال کے وزیر اعظم شیر بہادر دیوبا نے ٹویٹ کیا "نیپال کی حکومت اور عوام کی طرف سے، میں دروپدی مرمو کو ہندوستان کے 15ویں صدر منتخب ہونے پر دل کی گہرائیوں سے مبارکباد پیش کرنا چاہتا ہوں۔ مجھے یقین ہے کہ نیپال اور بھارت کے درمیان بہترین باہمی تعلقات آنے والے دنوں میں نئی بلندیوں کو دیکھیں گے۔
