وزیراعلیٰ مجسمہ کی نقاب کشائی کے لیے دادری پہنچنے سے ٹھیک پہلے، دادری کے بی جے پی کے رکن اسمبلی تیج پال سنگھ ناگر نے میہر بھوج کے نام کے سامنے لکھا ہوا گرجر لفظ ہٹا دیا۔
دراصل، گرجر کا لفظ پتھر کی تختی پر نہیں کندہ کیا گیا ہے۔ احتجاج کو روکنے کے لیے ایک پلاسٹک شیٹ پر لکھ کر چسپاں کیا گیا تھا۔ اس پر گورجر سماج میں غصہ پھیل گیا۔
ہجوم نے رکن اسمبلی کے خلاف نعرے بازی کی۔ ہائے ہائے اور مردہ باد کے نعرے بلند کیے۔
اکھیل بھارتیہ گرجر مہا سبھا کے قومی خازن ہریش چودھری نے کہا کہ گجروں کے ساتھ سازش کی گئی ہے، جو ہمیں نا قابل قبول ہے۔
موقع پر ہنگامہ برپا کرنے والے لوگوں نے کہا ، "گرجر سماج ایم ایل اے تیج پال سنگھ ناگر کو سبق سکھائے گا۔ ایم ایل اے نے گرجر سماج کی سخت توہین کی ہے۔ ناگر نے گجروں کو ذلیل کیا ہے۔ اس کے لیے گرجر سماج یقینی طور پر رکن اسمبلی کو سبق سکھائے گا۔ مشتعل گرجروں نے ایم ایل اے کے خلاف نعرے لگائے۔ ہنگامہ بڑھتا دیکھ کر ایم ایل اے تیج پال ناگر کسی طرح وہاں سے بھاگ نکلے۔
پورا معاملہ کیا ہے
تقریباً ایک سال پہلے ، گرجر ودیا سبھا نے دادری کے ڈگری کالج میں شہنشاہ میہر بھوج کا مجسمہ نصب کرنے کے منصوبے پر کام شروع کیا۔ دادری سمیت آس پاس کے علاقے سے تعاون کے پیسے لے کر 15 فٹ اونچا مجسمہ بنایا گیا۔ یہ مجسمہ معروف کاریگر رام سوتار نے بنایا ہے۔ گرجر ودیا سبھا نے وزیر اعلیٰ یوگی آدتیہ ناتھ کو اس مجسمے کی نقاب کشائی کی دعوت دی۔ وزیراعلیٰ کا پروگرام ملنے کے بعد یہ بات پھیل گئی کہ میہر بھوج کے نام میں گرجر کا لفظ شامل کیا جا رہا ہے۔ ٹھاکر برادری نے اس کی مخالفت شروع کر دی اور یہیں سے ٹھاکروں اور گرجروں کے درمیان کشیدگی شروع ہوئی اور اس مقام تک پہنچی۔