ہاکی انڈیا کے فیصلہ سے وزیر کھیل انوراگ ٹھاکر برہم

ہاکی انڈیا نے آئندہ سال برمنگھم میں منعقد ہونے والے دولت مشترکہ کھیلوں سے دستبرداری کا فیصلہ کیا ہے۔ ہاکی انڈیا نے منگل کو کامن ویلتھ گیمز سے دستبرداری کا فیصلہ کرتے ہوئے کہا کہ برمنگھم میں کامن ویلتھ گیمز اور ہانگجو میں ایشین گیمز کے درمیان صرف 32 دن کا وقفہ ہے۔

ہاکی انڈیا نے اپنے بیان میں کہا کہ وہ اپنے کھلاڑیوں کو برطانیہ بھیج کر خطرہ مول نہیں لینا چاہتا جو کہ عالمی وبا کورونا وائرسسے بری طرح متاثر ہے۔

وزیر کھیل انوراگ ٹھاکر نے ہاکی انڈیا کے اس فیصلے پر سخت اعتراض کیا ہے۔ انہوں نے کہا کہ کسی بھی ایسوسی ایشن یا فیڈریشن کو اس طرح کے بیانات دینے سے گریز کرنا چاہیے اور حکومت کے ساتھ بات چیت کرنی چاہیے، محکمہ کے ساتھ بات چیت کرنی چاہیے۔ کیونکہ ایک فیڈریشن کی ٹیم نہیں جا رہی، ملک کی ٹیم جا رہی ہے۔

130 کروڑ کے ملک میں صرف 18 کھلاڑی ہی نہیں جو ملک کی نمائندگی کرتے ہیں، دنیا بھر میں عالمی ایونٹس میں شرکت کا ایک موقع ہوتا ہے۔ میرا ماننا ہے کہ انہیں وزارت کھیل سے بات کرنی چاہیے فیصلہ حکومت کو کرنا ہے۔

انہوں نے مزید کہا ہاکی جیسے کھیل میں ٹیلنٹ کی کوئی کمی نہیں، اگر ہم کرکٹ میں دیکھیں تو ابھی آئی پی ایل چل رہا ہے، آگے ورلڈ کپ ہے، اگر وہ کھیل سکتے ہیں تو ہاکی ٹیم ایشین گیمز اور کامن ویلتھ گیمز میں کیوں نہیں کھیل سکتی؟

وزیر کھیل کے مطابق بھارت کی ٹیم کی نمائندگی کہاں کرنی ہے، یہ صرف فیڈریشن تک محدود نہیں ہے، یہ فیصلہ بھارت کو اور بھارتیہ حکومت کو کرنا ہے کیونکہ یہ قومی ٹیم ہے، فیڈریشن کی ٹیم نہیں ہے۔