Umesh Pal Murder case امیش پال قتل کیس میں دوسرا انکاؤنٹر، عثمان چودھری بھی ہلاک

یوپی پولیس نے امیش پال قتل معاملہ میں ایک اور ملزم وجے عرف عثمان چودھری کو ما ورائے عدالت انکاؤنٹر کرکے ہلاک کردیا ہے۔ ذرائع کے مطابق امیش پال اور اس کے گنرز پر جس نے سب سے پہلے گولی چلائی تھی وہ وجے چودھری عرف عثمان ہی تھا۔ اس سے قبل اسی کیس میں سرفراز نامی شخص کو انکاونٹر میں ہلاک کردیا گیا تھا۔ Usman chaudhary killed in police encounter

پریاگ راج: اُمیش پال قتل معاملہ میں پولیس نے پیر کی صبح پریاگ راج میں ایک شوٹر کو انکاؤنٹر کرکے ہلاک کردیا۔ پولیس نے جس شخص کا انکاؤنٹر کیا ہے، اس کا نام وجے چودھری عرف عثمان بتایا جارہا ہے۔ الزام ہے کہ عثمان نے سب سے پہلے امیش پال کو گولی ماری تھی۔ امیش پال قتل کیس کی سی سی ٹی وی فوٹیج کے مطابق امیش پال جیسے ہی اپنی گاڑی سے باہر نکلتا ہے، اس پر فائرنگ شروع ہوجاتی ہے، اس دوران جو شخص سب سے پہلے امیش پال اور اس کے سرکاری گنر کو گولی مارتا ہے۔ اس شخص کو پولیس نے پیر کو ایک تصادم میں ہلاک کردیا۔ پولیس اور شرپسندوں کے درمیان یہ تصادم پریاگ راج کے کاندھیارہ تھانہ علاقے میں ہوا۔

ذرائع کے مطابق پولیس کی ٹیم شوٹروں کی تلاش میں ان کے اصل مقام تک پہنچ تھی اور اس دوران پولیس اہلکاروں کو دیکھتے ہی شوٹر عثمان عرف وجے چودھری نے پولیس ٹیم پر فائرنگ شروع کر دی۔ پولیس نے بھی جوابی فائرنگ کی، جس میں فائرنگ کرنے والے عثمان کو گولی لگ گئی۔ پولیس نے اسے علاج کے لیے ایس آر این اسپتال منتقل کیا، جہاں اسے مردہ قرار دے دیا گیا۔ پولیس کے ساتھ تصادم میں ہلاک ہونے والے عثمان پریاگ راج کا رہنے والا بتایا جاتا ہے۔ اس کے خلاف پہلے بھی کئی مقدمات درج تھے۔

امیش پال قتل کیس کا سی سی ٹی وی ویڈیو منظر عام پر ہے، اس میں ملزم وجے چودھری عرف عثمان کو پیدل آتے دیکھا گیا۔ آج امیش پال کے قتل کا 10 واں دن ہے۔ پریاگ راج پولس اور یوپی ایس ٹی ایف لگاتار چھاپے مار رہی ہے۔ اسی دوران اطلاع ملی کی پولیس نے امیش پال پر پہلی گولی چلانے والے وجے عرف عثمان چودھری کو انکاؤنٹر میں ہلاک کردیا۔ اس سے قبل سرفراز نامی شخص بھی تصادم میں ہلاک کردیا گیا تھا۔ فائرنگ کے ویڈیو میں وجے چودھری عرف عثمان کے سامنے آنے کے بعد پولیس نے امیش پال کے شوٹروں پر انعام کی رقم بھی بڑھا کر ڈھائی لاکھ کر دی تھی۔ عثمان پر 50 ہزار روپے کا انعام تھا۔