UK Foreign Secretary in India برطانوی سیکرٹری خارجہ کی جے شنکر سے ملاقات، بی بی سی معاملہ اٹھایا

جی ٹوئنٹی وزرائے خارجہ کی میٹنگ میں شرکت کے لیے بھارت آئے برطانوی سکریٹری خارجہ جیمز کلیورلی نے اپنے بھارتی ہم منصب ایس جے شنکر سے ملاقات کی، اس دوران انھوں نے بی بی سی پر ٹیکس سروے کا معاملہ بھی اٹھایا۔ ذرائع کے مطابق جے شنکر نے کہا کہ بھارت میں کام کرنے والے تمام اداروں کو متعلقہ قوانین اور ضوابط کی مکمل تعمیل کرنی چاہیے۔

نئی دہلی: برطانوی سکریٹری خارجہ جیمز کلیورلی نے بدھ کے روز اپنے بھارتی ہم منصب ایس جے شنکر کے ساتھ بھارت میں بی بی سی پر حالیہ ٹیکس سروے کا مسئلہ اٹھایا۔ ذرائع کے مطابق جے شنکر نے یوکے لیڈر کو بتایا کہ بھارت میں کام کرنے والے تمام اداروں کو متعلقہ قوانین اور ضوابط کی مکمل تعمیل کرنی چاہیے۔ دراصل جے شنکر نے کلیورلی کے ساتھ دو طرفہ میٹنگ کی جس میں دونوں نے دیگر مسائل کے علاوہ ینگ پروفیشنل اسکیم کے آغاز پر غور کیا اور عالمی صورتحال کے ساتھ ساتھ جی 20 ایجنڈے پر بھی تبادلہ خیال کیا۔

برطانوی سکریٹری خارجہ کی جے شنکر سے ملاقات

جئے شنکر نے ٹویٹ کیا کہ صبح کا آغاز برطانیہ کے سکریٹری خارجہ جیمز کلیورلی کے ساتھ دو طرفہ ملاقات سے ہوئی۔ ہماری آخری بات چیت کے بعد سے ہمارے تعلقات میں پیشرفت کا جائزہ لیا۔ خاص طور پر ینگ پروفیشنل اسکیم کے آغاز پر غور کیا۔ عالمی صورتحال کے ساتھ ساتھ جی 20 ایجنڈا پر بھی تبادلہ خیال کیا۔ واضح ر ہے کہ جیمز کلیورلی یکم اور 2 مارچ کو جی 20 وزرائے خارجہ کی اہم میٹنگ میں شرکت کے لیے بھارت میں ہیں۔

قابل ذکر ہے کہ گزشتہ ماہ، محکمہ انکم ٹیکس کے حکام نے نئی دہلی اور ممبئی میں بی بی سی کے دفاتر میں سروے کیا۔ یہ کارروائی بی بی سی کی اس دستاویزی فلم کے بعد سامنے آئی ہے جس میں 2002 کے گجرات فسادات کے دوران وزیر اعظم نریندر مودی کی بطور وزیر اعلیٰ گجرات قیادت پر سوال اٹھایا گیا تھا۔ محکمہ انکم ٹیکس کے اہلکار پہلے 14 فروری کو بی بی سی کے دفاتر میں سروے شروع کیا اگلے 60 گھنٹے تک سروے کرتے رہے۔