Two Men allegedly burnt alive ہریانہ میں دو نوجوانوں کو زندہ جلادیا گیا

ہریانہ کے بھوانی میں دو نوجوانوں کو زندہ جلانے کا واقعہ پیش آیا ہے۔ دونوں کی جلی ہوئی لاشیں ہریانہ کے بھوانی میں ایک جلی ہوئی بولیرو گاڑی سے برآمد ہوئی ہیں۔ الزام ہے کہ بجرنگ دل سے جڑے لوگ جنید اور ناصر کو راجستھان سے اغوا کر کے ہریانہ لے گئے اور وہاں ان دونوں کو زندہ جلا کر مار ڈالا۔ وہیں اس معاملے میں بجرنگ دل کے کارکنان کے خلاف مقدمہ درج کیا گیا ہے۔

بھوانی: ہریانہ کے بھوانی کے لوہارو تھانہ علاقے کے گاؤں بارواس کے قریب بولیرو گاڑی میں دو لوگوں کو جلانے کا معاملہ سامنے آیا ہے۔ دونوں کی باقیات ایک ہی گاڑی سے ملی ہیں۔ مرنے والوں کی شناخت راجستھان بھرت پور کے رہنے والے جنید اور ناصر کے نام سے ہوئی ہے۔ اس واردات کو انجام دینے کا الزام بجرنگ دل کے پانچ لوگوں پر لگایا گیا ہے۔ اس واقعہ سے پورے علاقے میں کہرام مچ گیا ہے۔ پولیس پورے واقعہ کی تحقیقات میں مصروف ہے۔

جانکاری کے مطابق، گوپال گڑھ تھانہ علاقے کے پیروکا گاؤں کے رہنے والے جنید اور ناصر کو بدھ کے روز کچھ لوگوں نے اغوا کر لیا تھا۔ اس کے بعد جمعرات کو ہریانہ کے لوہارو کے پٹودی گاؤں میں ایک جلی ہوئی بولیرو ملی، جس کے اندر دو لوگوں کی جلی ہوئی لاشیں تھیں۔ دونوں مرنے والے جنید اور ناصر پیروکا گاؤں کے رہنے والے ہیں۔ بدھ کو ہی کزن اسماعیل نے جنید اور ناصر کی گمشدگی کی رپورٹ درج کرائی۔ 15 فروری کو گوپال گڑھ تھانے میں درج شکایت میں بتایا گیا کہ کزن جنید اور ناصر کو ہریانہ کے رہنے والے انل، سری کانت، رنکو سینی، لوکیش، سنگلا اور مونو منگل نے اغوا کر لیا۔ یہ پانچوں لوگ بجرنگ دل سے وابستہ ہیں۔

اسماعیل نے بتایا کہ جنید اور ناصر کو 8 سے 10 افراد نے بری طرح زدوکوب کیا اور زخمی حالت میں زبردستی بولیرو میں لے گئے۔ اسماعیل نے جنید اور ناصر کو فون کیا تو ان کے موبائل بند تھے۔ اسماعیل نے الزام لگایا کہ ملزمان بجرنگ دل کے کارکن تھے۔ ان میں ہریانہ کے باشندے انیل، سری کانت، رنکو سینی، لوکیش سنگلا وغیرہ شامل تھے۔ واقعہ کی اطلاع ملتے ہی ہریانہ پولیس بھی موقع پر پہنچ گئی۔ بھرت پور کے آئی جی گورو سریواستو نے بتایا کہ مقدمہ درج کر لیا گیا ہے۔ ٹیمیں موقع پر روانہ کر دی گئی ہیں۔ کیس کی تفتیش کی جا رہی ہے۔