Tripura Elections 2023 تریپورہ کی اپوزیشن جماعتوں نے ریاست کو لوٹنے کے لیے ہاتھ ملایا، مودی

تریپورہ میں بائیں بازو-کانگریس اتحاد پر سخت حملہ کرتے ہوئے وزیر اعظم نریندر مودی نے اسے غیر اخلاقی قرار دیا۔ انہوں نے یہ بھی الزام لگایا کہ ریاست میں اپوزیشن طاقتیں ترقیاتی فنڈز کو 'لوٹنے' کے لیے ایک ساتھ آگئی ہیں۔

اگرتلہ: وزیر اعظم نریندر مودی نے پیر کو تریپورہ میں بائیں بازو-کانگریس اتحاد پر سخت حملہ کرتے ہوئے اسے غیر اخلاقی قرار دیا۔ انہوں نے یہ بھی الزام لگایا کہ ریاست میں اپوزیشن طاقتیں ترقیاتی فنڈز کو 'لوٹنے' کے لیے ایک ساتھ آگئی ہیں۔ مودی نے اس شمال مشرقی ریاست میں 16 فروری کو ہونے والے انتخابات کے لیے حکمران بھارتیہ جنتا پارٹی کے حلقوں کی آخری بڑی ریلی سے خطاب کرتے ہوئے ووٹروں سے پرامن اور بڑے پیمانے پر پولنگ کو یقینی بنانے کی اپیل کی۔

کمیونسٹ پارٹی آف انڈیا-مارکسسٹ (سی پی آئی-ایم)، کانگریس اورٹی آئی پی آراے موتھا کی طرف اشارہ کرتے ہوئے وزیر اعظم نے لوگوں کو خبردار کیا کہ وہ 'چندا اور جھنڈا والا کمپنی' کے جھانے میں نہ آئیں۔ انہوں نے کہا کہ ان لوگوں نے 'لوٹنے والی کمپنی' اور 'تقسیم کرنے والے گروہ' سے ہاتھ ملایا ہے اور ترقیاتی فنڈز کو ہڑپ کرنے کی اپنی پرانی روایت کو بحال کرنا چاہتے ہیں۔ انہوں نے کہا کہ آزادی کے بعد پردھان منتری آواس یوجنا (پی ایم اے وائی) کے تحت غریبوں کی رہائش کے لیے مرکزی بجٹ میں سب سے زیادہ 80 لاکھ کروڑ روپے کا التزام کیا گیا ہے۔

انہوں نے الزام لگایا کہ اس 'گروہ' کی نظر اس رقم کو لوٹنے پر ہے۔ انہوں نے کہا کہ تریپورہ نے پانچ سال میں پی ایم اے وائی کے تحت تین لاکھ سے زیادہ مکانات کی تعمیر کے ساتھ ملک میں ایک ریکارڈ بنایا ہے۔ مودی نے کہا کہ جب میں 2014 میں وزیر اعظم بنا تو میں نے اس وقت کی بائیں محاذ کی حکومت سے پی ایم اے وائی اسکیم کا فائدہ اٹھانے کی درخواست کی لیکن انہوں نے اس میں کوئی دلچسپی نہیں دکھائی۔ نتیجہ یہ ہوا کہ بی جے پی کی قیادت والی حکومت کے اقتدار میں آنے سے پہلے میری پوری کوشش کے باوجود صرف چند ہزار لوگوں کو ہی مکانات دیے گئے۔ لیکن 2018 میں، ڈبل انجن والی حکومت (مرکز اور ایک خاص ریاست دونوں میں ایک ہی پارٹی کے زیر انتظام حکومتیں) کے قیام کے بعد یہ اعدادوشمار تین لاکھ سے زیادہ ہو گیا۔

یواین آئی