نئی دہلی: روڈ ٹرانسپورٹ اور ہائی ویز کے وزیر نتن گڈکری نے کہا ہے کہ دہرادون-ہریدوار ایکسپریس وے پر گاڑیوں کی آسانی سے نقل و حرکت اور جنگلی جانوروں کو محفوظ راستہ فراہم کرنے کے لیے تین انڈر پاس بنائے گئے ہیں۔ گڈکری نے کہا کہ دہرادون سے ہریدوار کے درمیان نیشنل ہائی وے-7 تک تین انڈر پاس بنائے گئے ہیں۔ اس جنگلاتی علاقے میں جنگلی حیوانات کے تحفظ کے پیش نظر جنگلی جانوروں خصوصاً ہاتھیوں کی آزادانہ نقل و حرکت کے لیے محفوظ راستے فراہم کرنے کے لیے تین انڈر پاس بنائے گئے ہیں۔
انہوں نے کہا کہ یہ انڈر پاس اس بات کے مدنظر بنائے گئے ہیں کہ جنگلاتی علاقے میں انسانوں کی نقل و حرکت سے جنگلی جانوروں کا طرز زندگی متاثر نہ ہو۔ اس کا مقصد جنگلی حیوانات کی آزادانہ نقل و حرکت کو فروغ دینا اور انہیں تحفظ فراہم کرنا ہے۔ یہ پہلا جنگلی حیوانات کا علاقہ ہے جس پر انسانی ترقی کے منفی اثرات کو کم کرنے اور حیاتیاتی تنوع کے تحفظ کی حوصلہ افزائی کے لیے خصوصی اقدامات کیے گئے ہیں۔اہم بات یہ ہے کہ اس ایکسپریس وے پر ایشیا کا سب سے طویل وائلڈ لائف کوریڈور بنایا جا رہا ہے۔ اس راہداری کی تعمیر سے جنگلی جانوروں اور انسانوں کا آمنا سامنا نہیں ہو گا کیونکہ راہداری کے اوپر سے گاڑیاں چلیں گی اور ہاتھی اور دیگر جنگلی جانور نیچے سے آسانی سے گزر سکیں گے۔ اس ایکسپریس وے پر کل چھ انڈر پاس بنائے جائیں گے۔