طالبان نے کابینہ میں شامل افراد کی فہرست پیش کردی

افغان طالبان نے اپنی عبوری حکومت تشکیل کرتے ہوئے اپنی کابینہ فہرست عام کردی ہے جس میں 33 ارکان شامل ہیں اور اس میں ردوبدل اور اضافہ بھی ممکن ہے۔

افغانستان میں طالبان نے عبوری حکومت کا اعلان کرتے ہوئے کہا کہ 'ملا محمد حسن اخوند عبوری وزیراعظم ہوں گے'۔ گذشتہ روز طالبان کے ترجمان ذبیح اللہ مجاہد نے افغانستان کے دارالحکومت کابل میں ایک پریس کانفرنس میں عبوری حکومت کے لیے کابینہ کے اراکین کے ناموں کا اعلان کیا۔

طالبان نے کابینہ میں شامل افراد کی فہرست پیش کردی

انہوں نے بتایا کہ ملا محمد حسن اخوند افغانستان کے عبوری وزیر اعظم ہوں گے، جبکہ ملا عبدالغنی برادر اورمولوی عبدالسلام حنفی نائب وزرائے اعظم ہوں گے۔ آج قطر میں طالبان کے سیاسی دفتر کے ترجمان محمد نعیم نے کابینہ کے ارکان کی مکمل فہرست جاری کی ہے۔

'جیو نیوز' کے مطابق اپنے بیان میں انہوں نے کہا کہ افغانستان سے جنگ کی تمام وجوہات ختم ہوچکی ہیں اور عوام پہلی بار جامع سلامتی اور امن سے لطف اندوز ہورہے ہیں، مضبوط اسلامی نظام کے قیام کی بنیاد رکھ دی گئی ہے۔

انہوں نے کہا کہ جن وزارتوں، محکموں اور اداروں کے سربراہان کا اعلان نہیں کیا گیا ان سے متعلق مشاورت جاری ہے اور جلد ان کا بھی اعلان کردیا جائے گا۔ محمد نعیم کی جاری کردہ فہرست میں کابینہ کے ارکان اور اداراتی سربراہان کی تعداد 33 بتائی گئی ہے جس میں رد و بدل اور اضافہ بھی ممکن ہے۔

یو این آئی