ناگور کی صوفی حمیدالدین ناگوری کی درگاہ زائرین کے لئے بند

حضرت خواجہ حسن معین الدین چشتی رحمۃ اللہ علیہ کے خاص خلیفہ حضرت صوفی حمیدالدین ناگوری رحمۃ اللہ علیہ کی درگاہ راجستھان کے ناگور میں واقع ہے۔ رمضان کے مقدس ماہ میں ان کے در پر روزانہ ہزاروں کی تعداد میں عقیدت مند حاضری دیتے ہیں۔

لیکن درگاہ کی انتظامیہ کمیٹی کی جانب سے کورونا وبا کے مدنظر درگاہ کو بند کردیا گیا ہے۔ درگاہ میں داخل ہونے والے تمام دروازوں پر تالے لگادئے گئے ہیں۔ محض پانچ یا دس لوگ ہی یہاں پر اپنی خدمات انجام دیتے ہوئے نماز اور تراویح ادا کررہے ہیں۔

ایسا پہلی مرتبہ نہیں ہوا ہے جب اتنی بڑی درگاہ کو تالے لگا کر بند کرنے کا فیصلہ انتظامیہ کمیٹی کی جانب سے لیا گیا ہو بلکہ دوسری مرتبہ ایسا ہوا ہے جب درگاہ پر تالے لگادئے گئے ہیں۔ کورونا وائرس نے جب بھارت میں دستک دی تھی اور یہاں پر کافی زیادہ تعداد میں کورونا وائرس سے متاثر لوگ نظر آرہے تھے تب بھی درگاہ کو بند کر دیا گیا تھا۔

واضح رہے کہ درگاہ میں ہر برس عرس بھی ہوتا ہے لیکن اس مرتبہ یہاں پر عرس نہیں ہوسکا تھا۔ درگاہ کمیٹی کی ذمہ داران کے مطابق کورونا وبا کے مدنظر حکومتی ایڈوائزر کی مکمل طور پر تعمیل کرنے کے لیے درگاہ کو بند کرنے کا فیصلہ کیا گیا ہے۔

درگاہ کمیٹی کے ذمہ داران نے عقیدتمندوں سے اپیل کی ہے کہ تمام طرح کی فاتحہ خوانی عوام اپنے اپنے گھروں پر ہی ادا کریں۔ درگاہ تاحکم ثانی بند کردی گئی ہے۔ درگاہ کی کشادگی پر عوام کو اطلاع دی جائے گی۔