سینئر وائرولوجسٹ شاہد جمیل کا استعفیٰ

ایک جانب جہاں ملک اس وقت کورونا وبا کی دوسری لہر سے جوجھ رہا ہے۔ ادھر، سینئر وائرولوجسٹ شاہد جمیل نے بھارتی SARS-CoV-2 جینومکس کنسورشیم کے سائنسی مشاورتی گروپ کے چیئرمین کے عہدے سے استعفی دے دیا ہے۔

شاہد جمیل کو کورونا کے جینوم ڈھانچے کی شناخت کی ذمہ داری سونپی گئی تھی۔ تاہم، یہ واضح نہیں ہے کہ 'شاہد جمیل نے اس عہدے سے استعفی کیوں دیا ہے۔ جمیل اشوکا یونیورسٹی میں تریویدی اسکول آف بائیو سائنس کے ڈائریکٹر بھی ہیں'۔

حال ہی میں شاہد جمیل کا نیو یارک ٹائمز میں ایک مضمون شائع ہوا تھا۔ اس مضمون میں انہوں نے مودی حکومت کو تنقید کا نشانہ بناتے ہوئے کہا تھا کہ 'ملک میں سائنس دانوں کو حکومت کے ضدی رویہ کا سامنا کرنا پڑتا ہے۔ انہوں نے حکومت پر سائنسدانوں کے مشورے کو قبول نہیں کرنے کا الزام عائد کیا'۔

مضمون میں انہوں نے کہا کہ 'مودی حکومت کو ملک کے سائنسدانوں کی بات سننی چاہیے اور پالیسی سازی میں ضد کا رویہ چھوڑنا چاہیے۔ میں پریشان ہوں کہ پالیسی چلانے کے لیے سائنس کو نظرانداز کیا گیا۔ لیکن میں جانتا ہوں کہ میرا دائرہ اختیار کتنا ہے'۔