سلمان خان کی فلم رادھے 13 مئی کو عید کے موقع پر ریلیز کی جائے گی

سلمان خان کی فلم رادھے 13 مئی کو عید کے موقع پر ریلیز کی جائے گی۔ فلم ایسے وقت ریلیز کی جارہی ہے جب عوام کورونا وائرس وبا سے شدید ذہنی دباؤ میں ہیں۔ یہ فلم شیڈول کے مطابق 13 مئی کو تھیئٹرز میں ریلیز کی جائے گی جبکہ کئی پلیٹ فارمز پر بھی اس فلم کو دیکھا جاسکے گا۔

بالی ووڈ سپر اسٹار سلمان خان کی فلم رادھے کی ریلیز مقررہ وقت پر 13 مئی کو عید کے روز ہو گی۔ اس فلم کی ریلیز میں کورونا وائرس کے سبب کوئی تاخیر نہیں ہوگی۔ اس فلم کا شائقین کو بے صبری سے انتظار ہے۔

کورونا وائرس کی دوسری لہر نے تجارت اور فلمی صنعت کو بری طرح متاثر کیا ہے اور دوسری مرتبہ ملک بھر میں کورونا وائرس کے پھیلنے کے خدشہ سے عوامی اجتماعات پر پابندیاں عائد کی جارہی ہیں۔ ایسے میں ان پابندیوں کا اثر فلمی صنعت پر بھی پڑا ہے لیکن سلمان خان نے مقررہ تاریخ پر ہی فلم ریلیز کرنے کا اعلان کیا ہے۔

کافی تاخیر کے بعد ایکشن سے بھر پور فلم 13 مئی کو ریلیز کی جائے گی۔ اس فلم کے پروڈیوسر سلمان خان اور زی اسٹوڈیو ہیں۔

زی اسٹوڈیو نے کہا کہ اس فلم کو ہائیبرڈ انداز میں ریلیز کیا جائے گا یعنی تھیئٹرز کے ساتھ ساتھ ڈیجیٹل پلیٹ فارمز پر بھی ریلیز کیا جائے گا۔

سلمان خان فلمز اور زی اسٹوڈیو کی جانب سے ایک بیان جاری کیا گیا جس میں کہا گیا کہ فلم ملک بھر کے تمام سنیما گھروں میں مقررہ تاریخ پر ریلیز کی جائے گی۔ اگر وہاں کورونا وائرس پروٹوکول کے مطابق تھیئٹرز کھلے ہوں۔

سلمان خان فلمز کے آفیشل ٹویٹر ہینڈل نے ہیش ٹیگ کے ساتھ ٹویٹ کیا کہ ''عید کا مکمل جشن! 'رادھے' آپ کے سب سے مطلوب بھائی جان کئی پلیٹ فارمز پر ریلیز کر رہے ہیں۔''